ಕುಷ್ಟಗಿ | ಮುಂಗಾರು ಹಬ್ಬ: ಭರವಸೆಯ ನಿರೀಕ್ಷೆಯಲ್ಲಿ ರೈತ

ಇತ್ತೀಚಿನ ವರ್ಷಗಳಲ್ಲಿ ಎತ್ತುಗಳ ಸಂಖ್ಯೆ ಯಾರೂ ನಿರೀಕ್ಷಿಸದಷ್ಟು ವೇಗದಲ್ಲಿ ಕಡಿಮೆಯಾಗಿರುವುದು ಕಂಡುಬಂದಿದೆ. ಕೆಲ ಹಳ್ಳಿಗಳಲ್ಲಿ ಬೆರಳೆಣಿಕೆಯಷ್ಟು ರೈತರು ಮಾತ್ರ ಎಷ್ಟೇ ಕಷ್ಟವಾದರೂ ಎತ್ತುಗಳನ್ನು ಉಳಿಸಿಕೊಂಡಿದ್ದಾರೆ. ಬಿತ್ತನೆಗೂ ಟ್ರ್ಯಾಕ್ಟರ್‌ಗಳನ್ನೇ ಬಳಕೆ ಮಾಡಿಕೊಳ್ಳಲಾಗುತ್ತಿದ್ದು ಎತ್ತುಗಳ ಕೊರಳ ಗೆಜ್ಜೆನಾದ ಕೇಳದಂತಾಗಿದೆ. ಹಾಗಾಗಿ ಬಡಿಗ ಕಮ್ಮಾರರಿಗೆ ಕೂರಿಗೆ ಕೆತ್ತುವ ಕೆಲಸವೂ ಕಡಿಮೆಯಾಗಿದೆ ಎನ್ನಲಾಗುತ್ತಿದೆ. ಯಂತ್ರ ಮತ್ತು ಎತ್ತುಗಳಿಂದ ಬಿತ್ತನೆಗೆ ಸಂಬಂಧಿಸಿದ ವ್ಯತ್ಯಾಸ ಕುರಿತು ಹಿರಿಯ ರೈತ ಶರಣಪ್ಪ ಹೊಸೂರು ತನ್ನ ಎತ್ತುಗಳ ಮೈ ಸವರುತ್ತ ಹೇಳಿದ್ದು ಹೀಗೆ ‘ನೀವೇನ ಅನ್ರಿ ಎತ್ತಿಲೆ ಬಿತ್ತಿದ್ದ ಬ್ಯಾರೆ ಬಸವ ಹೆಜ್ಜಿ ಇಟ್ರ ಭೂತಾಯಿ ನಡಗತಾಳ ಅಷ್ಟೊಂದು ಶಕ್ತಿ ಐತಿ ಎತ್ತಿನ ಕೂರಿಗೆಯಿಂದ ಬಿತ್ತಿದ ಬೆಳಿ ಸಾಲ ನೋಡ್ರಿ ಹ್ಯಾಂಗಿರತೈತಿ’ ಹೀಗೆ ಆತ ಎತ್ತುಗಳ ಅಗತ್ಯತೆ ಇದೆ ಎಂದು ಅವುಗಳ ಮಹತ್ವವನ್ನು ಹಂಚಿಕೊಂಡರು.

ಮಳೆ ಆರಂಭಗೊಳ್ಳುತ್ತಿದ್ದಂತೆ ಮೈಕೊಡವಿರುವ ಕೃಷಿಕರಲ್ಲಿ ಮುಂದೆ ಸಿಗುತ್ತದೆಯೊ ಅಭಾವ ಆಗುತ್ತದೆಯೊ ಎಂದೆ ಈಗಲೇ ರಸಗೊಬ್ಬರ ಖರೀದಿಸಿ ಸಂಗ್ರಹಿಸಿಟ್ಟುಕೊಳ್ಳುವಲ್ಲಿ ಧಾವಂತ ಕಂಡುಬರುತ್ತಿದ್ದು ವಾಹನಗಳಲ್ಲಿ ಡಿಎಪಿ ಯೂರಿಯಾ ಗೊಬ್ಬರ ಚೀಲಗಳ ಮೂಟೆಗಳನ್ನು ಹೇರಿಕೊಂಡು ಹೋಗುತ್ತಿರುವುದು ಸಾಮಾನ್ಯವಾಗಿದೆ. ಕೆಲ ವರ್ಷಗಳ ಹಿಂದೆ ಡಿಎಪಿಗಾಗಿ ರೈತರು ಪರದಾಡಿ ರಗಳೆ ಮಾಡಿಕೊಂಡ ಉದಾಹರಣೆಗಳೂ ಇವೆ. ಕಾಳಸಂತೆ ಕೃತಕ ಅಭಾವ ಸೃಷ್ಟಿಸುವುದನ್ನು ನಿಯಂತ್ರಿಸಲೆಂದೆ ಗೊಬ್ಬರ ವಿತರಣೆಗೂ ಸರ್ಕಾರ ನಿಯಮಗಳನ್ನು ವಿಧಿಸಿತ್ತು. ಆಧಾರ್ ಗುರುತಿನ ಚೀಟಿ ತಂದವರಿಗೆ ಮಾತ್ರ ವಿತರಕರು ಗೊಬ್ಬರ ನೀಡುತ್ತಿದ್ದರು. ಆದರೆ ಸದ್ಯ ಗುರುತಿನ ಚೀಟಿ ಇಲ್ಲದೆಯೇ ಗೊಬ್ಬರ ದೊರೆಯುತ್ತಿದೆ ಎಂಬ ಸಮಾಧಾನ ರೈತರಿಂದ ಕೇಳಿಬಂದಿತು.

ಬೆಳೆಯಲ್ಲಿ ವೈವಿಧ್ಯತೆ ಇರಲಿ ಪದೇಪದೆ ಒಂದೇ ಬೆಳೆ ಬೆಳೆಯುವುದು ಬೇಡ ಎಂಬ ಕೃಷಿ ಇಲಾಖೆ ಸೂಚನೆಯ ನಡುವೆಯೂ ಮೆಕ್ಕೆಜೋಳ ಬೀಜಕ್ಕೆ ರೈತರಿಂದ ಮತ್ತೆ ಹೆಚ್ಚಿನ ಬೇಡಿಕೆ ಬಂದಿದೆ. ಈವರೆಗೂ ಸುಪ್ತಾವಸ್ಥೆಯಲ್ಲಿದ್ದ ಬಿತ್ತನೆಬೀಜದ ಖಾಸಗಿ ಕಂಪನಿಗಳ ಪ್ರತಿನಿಧಿಗಳು ತಮ್ಮ ಬೀಜ ಖರೀದಿಸುವಂತೆ ರೈತರಿಗೆ ದುಂಬಾಲು ಬೀಳುತ್ತಿರುವುದು ಕಂಡುಬಂದಿದೆ. ಕೃಷಿ ಇಲಾಖೆ ಖಾಸಗಿಯವರಿಂದ ಎಲ್‌ ಒನ್‌ ದರದಲ್ಲಿ ಖರೀದಿಸುವ ಬೀಜಗಳನ್ನು ರೈತರಿಗೆ ರಿಯಾಯಿತಿ ದರದಲ್ಲಿ ವಿತರಿಸಲಾಗುತ್ತಿದ್ದು ಬೀಜ ಸರಬರಾಜು ಮಾಡುವುದಕ್ಕೆ ಕೃಷಿ ಇಲಾಖೆಯೊಂದಿಗೆ ಖಾಸಗಿ ಕಂಪನಿಗಳು ವಿವಿಧ ರೀತಿಯಲ್ಲಿ ಪೈಪೋಟಿಗಿಳಿದಿವೆ ಎನ್ನಲಾಗಿದೆ.

ಕೊಪ್ಪಳ: ಬರಗಾಲದ ಬೇಗೆಗೆ ಬೇಸತ್ತು ಹೋಗಿದ್ದ ಜಿಲ್ಲೆಯ ಜನರಿಗೆ ಪೂರ್ವ ಮುಂಗಾರಿನಲ್ಲಿ ಮೇಲಿಂದ ಮೇಲೆ ಸುರಿಯುತ್ತಿರುವ ಮಳೆ ಅನ್ನದಾತರಲ್ಲಿ ಆಶಾಭಾವನೆ ಮೂಡಿಸಿದೆ. ಬಿರುಬಿಸಿಲು ಬಿಸಿಗಾಳಿ ಮತ್ತು ಅರೆಝಳಕ್ಕೆ ಬೇಸಿಗೆ ಅವಧಿಯಲ್ಲಿ ರೋಸಿ ಹೋಗಿದ್ದ ಜನರಿಗೆ ಈಗ ಬೀಳುತ್ತಿರುವ ಮಳೆ ಖುಷಿ ನೀಡಿದೆ. ರೈತರ ಹಣೆಯ ಮೇಲಿನ ಚಿಂತೆಯ ಗೆರೆಗಳನ್ನು ದೂರ ಮಾಡುತ್ತಿವೆ. ಬರಿದಾಗಿ ಹೋಗಿದ್ದ ಕೆರೆ ಕಟ್ಟೆಗಳು ನಿಧಾನವಾಗಿ ನೀರು ತುಂಬಿಕೊಳ್ಳುತ್ತಿವೆ. ಮುಖ್ಯವಾಗಿ ಜಾನುವಾರುಗಳಿಗೆ ನೀರಿನ ಸಮಸ್ಯೆಯಾಗಿತ್ತು. ಬಿಸಿಲಿನ ಬೇಗೆ ಮುಗಿದು ಮಳೆಯಾಗುತ್ತಿದ್ದಂತೆಯೇ ಜನರಲ್ಲಿ ಸಂಭ್ರಮ ಮನೆ ಮಾಡಿದೆ.