ಸಂದರ್ಶನ | ಮೈಸೂರು ರಂಗಾಯಣದ ನೂತನ ನಿರ್ದೇಶಕ ಸತೀಶ್‌ ತಿಪಟೂರು ಅವರೊಂದಿಗೆ...

ಬಹುತ್ವದ ನೆಲೆಯಲ್ಲಿ ಮನೆಮನೆಗೆ ರಂಗಾಯಣವನ್ನು ಕೊಂಡೊಯ್ಯುವುದು ನನ್ನ ಆಶಯ. ಕಾಲದ ಅಗತ್ಯಕ್ಕೆ ತಕ್ಕಂತೆ ರಂಗ ಭಾಷೆ ರೂಪಿಸಬೇಕು. ಕಲಾವಿದರು, ತಂತ್ರಜ್ಞರಿಗೆ ಬದುಕು ಕಟ್ಟಿಕೊಳ್ಳುವ ಅವಕಾಶಗಳನ್ನು ನಿರ್ಮಿಸಬೇಕು. ರಂಗಾಯಣದ ಸಮುದಾಯೀಕರಣ ಆಗಬೇಕಿದೆ.

ಹೊಸ ರಂಗಪಠ್ಯಗಳು ರೂಪುಗೊಳ್ಳಬೇಕು. ನಟ, ಕಲಾವಿದ ಕೌಶಲಕ್ಕೆ ಸಾಮಾಜಿಕ ಮನ್ನಣೆ ಸಿಗಬೇಕು. ಅವರಲ್ಲಿ ವಿಮರ್ಶೆ, ತರ್ಕ, ವಿನ್ಯಾಸ ಪ್ರಜ್ಞೆಯನ್ನು ಬೆಳೆಸಬೇಕು. ತಂತ್ರಜ್ಞಾನವೇ ಮುಖ್ಯವೆಂದಾಗಿರುವ ಕಾಲದಲ್ಲಿ ನಾಟಕಗಳನ್ನು ನೋಡುವಂತೆ ಮಾಡಬೇಕೆಂದರೆ ಹೊಸ ನಟರು, ಕಲಾವಿದರು, ತಂತ್ರಜ್ಞರನ್ನು ರೂಪಿಸಬೇಕು. ಇಂಟಿಗ್ರೇಟೆಟ್‌ ಕೋರ್ಸ್‌ಗಳಿಗೆ ಈ ಕಾಲದ ಪಠ್ಯಗಳನ್ನು ಸೇರಿಸಬೇಕು. 

ಅಭಿವ್ಯಕ್ತಿಯನ್ನು ಹೊಸಕಿ ಹಾಕುವುದು ರಂಗಭೂಮಿಯ ತತ್ವವಲ್ಲ. ಪ್ರಶ್ನಿಸುವವರನ್ನು ಗೌರವಿಸಬೇಕು. ಅವರ ಅಭಿಪ್ರಾಯವನ್ನು ಆಲಿಸುವ ಗುಣವಿರಬೇಕು. ಅದೇ ಬಹುತ್ವದ ಮೂಲ ತತ್ವ. ನೆಲದ ಸಂವಿಧಾನದ ಆಶಯ. ಅತ್ಯುತ್ತಮ ಕಲಾವಿದರು, ನಟರು, ತಂತ್ರಜ್ಞರು ರಂಗಾಯಣದಲ್ಲಿದ್ದಾರೆ. ಎಲ್ಲ ರಂಗಮನಸ್ಸುಗಳ ಜೊತೆಗೂಡಿಯೇ ನಾಟಕ ಕಟ್ಟಬೇಕು. ಹವ್ಯಾಸಿಗಳೂ ರಂಗಭೂಮಿ ಉಳಿಸಿದ್ದಾರೆ. ರಂಗಾಯಣದ ರಥದ ಮಿಣಿಯನ್ನು ಎಲ್ಲರೂ ಸೇರಿಯೇ ಎಳೆಯಬೇಕು. ಇನ್ನು ಎರಡ್ಮೂರು ದಿನದಲ್ಲಿ ಜವಾಬ್ದಾರಿ ವಹಿಸಿಕೊಳ್ಳುವೆ.

ರಂಗಾಯಣವು ಎಲ್ಲರನ್ನೂ ಒಳಗೊಳ್ಳುವ ಮುಕ್ತ ವಿಶ್ವವಿದ್ಯಾಲಯವಾಗಬೇಕು. ಹೊಸ ಪ್ರೇಕ್ಷಕರನ್ನು ಕರೆತರಬೇಕು. ಬಹುಸಂಖ್ಯಾತ ಸಮುದಾಯವನ್ನು ತಲುಪಬೇಕು. ಸಾಂಸ್ಕೃತಿಕ ಪ್ರಜ್ಞೆಯನ್ನು ರೂಪಿಸಬೇಕು. ನಿರ್ಲಕ್ಷಿತ ಸಮುದಾಯಗಳ ಕಥನ– ಕಾವ್ಯಗಳು ಸಂಸ್ಕೃತಿಗಳನ್ನು ವೇದಿಕೆಗೆ ತರಬೇಕು.