ಚನ್ನಪಟ್ಟಣ ಉಪ ಚುನಾವಣೆ: ಪ್ರಚಾರದಲ್ಲಿ ಪ್ರತಿಧ್ವನಿಸಿದ ‘ಮೇಕೆದಾಟು’ ರಾಜಕೀಯ

‘ಇನ್ನೊಬ್ಬರ ಬಳಿ ಕೈ ಚಾಚುವ ರೀತಿ ನಮ್ಮ ಅಪ್ಪ-ಅಮ್ಮ ನಮ್ಮನ್ನು ಬೆಳೆಸಿಲ್ಲ ದೇವೇಗೌಡರೇ‌. 23ನೇ ವಯಸ್ಸಿಗೇ ನಮ್ಮಣ್ಣನನ್ನು ನಿಮ್ಮ ವಿರುದ್ಧ ತೊಡೆ ತಟ್ಟಿ ನಿಲ್ಲಿಸಿದ್ದಾರೆ. ಯಾರ ಬಳಿಯೂ ಕೆರೆಯನ್ನು ಬರೆಸಿಕೊ ಎಂದು ಹೇಳಿಲ್ಲ. ನೀವು ಡಿಸಿಎಂ ಬಗ್ಗೆ ಮಾತನಾಡಿದರೆ ಸುಮ್ಮನಿರುತ್ತಿದ್ದೆ. ಆದರೆ ನಮ್ಮಣ್ಣನ ಬಗ್ಗೆ ಮಾತನಾಡಿದ್ದೀರಿ. ಹಿರಿಯರು ಅಂತ ಗೌರವ ಕೊಟ್ಟರೆ ಏನೇನೊ ಮಾತನಾಡುತ್ತೀರಾ? ಕುತಂತ್ರ ಮಾಡಿ ನಮ್ಮಣ್ಣನನ್ನು ಜೈಲಿಗೆ ಕಳಿಸಿದ್ದ ನೀವು ಈಗ ಸಿದ್ದರಾಮಯ್ಯ ಅವರ ವಿರುದ್ದವು ಅದೇ ಕೆಲಸ ಮಾಡಲು ಮುಂದಾಗಿದ್ದೀರಿ. ಗ್ಯಾರಂಟಿ ಯೋಜನೆಗಳನ್ನು ಕೊಟ್ಟಿದ್ದಕ್ಕೆ ಹೀಗೆ ಮಾಡ್ತಿದ್ದೀರಾ? ಮೊಮ್ಮಗನ ಚುನಾವಣಾ ಪ್ರಚಾರಕ್ಕೆ ಈಗ ಬಂದು ಸರ್ಕಾರ ತೆಗೆಯುತ್ತೇನೆ ಎಂದು ಎದೆ ಬಡಿದುಕೊಂಡು ಮಾತನಾಡುತ್ತೀರಾ ಗೌಡರೇ’ ಎಂದು ತಮ್ಮ ಅಣ್ಣ ಡಿಕೆಶಿ ವಿರುದ್ಧದ ಗೌಡರ ಟೀಕೆಗೆ ಮಾಜಿ ಸಂಸದ ಡಿ.ಕೆ. ಸುರೇಶ್ ಆಕ್ರೋಶ ವ್ಯಕ್ತಪಡಿಸಿದರು.

‘ಮುಸಲ್ಮಾನರಿಗೆ ಮೀಸಲಾತಿ ಕೊಟ್ಟಿದ್ದು ನಾನೇ ಎನ್ನುತ್ತಿರುವ ದೇವೇಗೌಡರು ಜನರ ದಾರಿ ತಪ್ಪಿಸುತ್ತಿದ್ದಾರೆ. ಮೀಸಲಾತಿ ಕೊಟ್ಟಿದ್ದು ವೀರಪ್ಪ ಮೊಯಿಲಿ. ಮೀಸಲಾತಿ ಕುರಿತು ಅವರು ಹಿಂದುಳಿದ ವರ್ಗಗಳ ಆಯೋಗಕ್ಕೆ ವರದಿ ಕಳಿಸಿದ್ದ ಮೊಯಿಲಿ ಅವರು ಶೇ 6ರಷ್ಟು ಮೀಸಲಾತಿ ಶಿಫಾರಸು ಮಾಡಿದ್ದರು. ನಂತರ ಬಂದ ದೇವೇಗೌಡರು ಕೊಟ್ಟಿದ್ದು ಕೇವಲ ಶೇ 4ರಷ್ಟು ಮೀಸಲಾತಿ ಕೊಟ್ಟು ನಮಗೆ ಮೋಸ ಮಾಡಿದ್ದಾರೆ. ಬಿಜೆಪಿಯವರು ಮುಸ್ಲಿಮರ ಮತ ಬೇಕಿಲ್ಲ ಎನ್ನುತ್ತಾರೆ. ಅವರ ಜೊತೆ ಕೈ ಜೋಡಿಸಿರುವ ಜೆಡಿಎಸ್‌ನವರು ಯಾವ ಮುಖ ಇಟ್ಟುಕೊಂಡು ನಮ್ಮ ಮತ ಕೇಳುತ್ತಾರೆ. ಮುಸ್ಲಿಮರ ಪರ ಇದ್ದೇವೆ ಎಂದು ಬಿಜೆಪಿಯವರಿಂದ ಹೇಳಿಸಲಿ. ಆಗ ನಿಖಿಲ್‌ಗೆ ಮತ ಹಾಕಲು ಚಿಂತನೆ ಮಾಡುತ್ತಾರೆ’ ಎಂದು ಸಚಿವ ಜಮೀರ್ ಅಹಮದ್ ಸವಾಲು ಹಾಕಿದರು.