ಕಾರವಾರ– ಬಂದರುಗಳಲ್ಲಿ ಚಟುವಟಿಕೆ ಸ್ತಬ್ಧ: ಮೀನುಗಾರಿಕೆ ಕ್ಷೇತ್ರಕ್ಕೆ ಬರಗಾಲದ ಏಟು

ಪರ್ಸಿನ್ ದೋಣಿಗಳಲ್ಲಿ ಸರಾಸರಿ 20 ರಿಂದ 25 ಮಂದಿ ಕಾರ್ಮಿಕರು ಕೆಲಸ ನಿರ್ವಹಿಸುತ್ತಾರೆ. ಈ ಪೈಕಿ ಬಹುತೇಕ ಮಂದಿ ಹೊರರಾಜ್ಯದವರೇ ಆಗಿದ್ದಾರೆ. ಒರಿಸ್ಸಾ ಝಾರ್ಖಂಡ್ ಛತ್ತೀಸಗಡ ಸೇರಿದಂತೆ ಉತ್ತರ ಭಾರತದ ಕೆಲ ರಾಜ್ಯಗಳಿಂದ ನೂರಾರು ಸಂಖ್ಯೆಯಲ್ಲಿ ವಲಸೆ ಬರುವ ಕಾರ್ಮಿಕರು ಬೈತಕೋಲ ಮುದಗಾ ಹೊನ್ನಾವರ ಸೇರಿ ಹಲವೆಡೆ ಕಾರ್ಯನಿರ್ವಹಿಸುತ್ತಾರೆ. ಆಗಸ್ಟ್ ವೇಳೆಗೆ ಬರುವ ಅವರು ಮೇ ತಿಂಗಳ ಅಂತ್ಯದವರೆಗೆ ದುಡಿದು ಊರಿಗೆ ಮರಳುತ್ತಿದ್ದರು. ಈ ಬಾರಿ ಮಾರ್ಚ್ ಅಂತ್ಯಕ್ಕೆ ಬಹುತೇಕ ಕಾರ್ಮಿಕರು ತವರಿಗೆ ಮರಳಿದ್ದಾರೆ. ಕಾರ್ಮಿಕರಿಂದ ಗಿಜಿಗುಡುತ್ತಿದ್ದ ಬಂದರುಗಳಲ್ಲಿ ಮೌನ ವಾತಾವರಣ ಮೂಡಿದೆ. ‘ಮೀನುಗಾರಿಕೆ ಚಟುವಟಿಕೆ ಇದ್ದರೆ ಕಾರ್ಮಿಕರ ವೇತನ ಒದಗಿಸಲು ಸಾಧ್ಯವಿದೆ. ಚಟುವಟಿಕೆಯೇ ಇಲ್ಲದೆ ಲಕ್ಷಾಂತರ ರೂಪಾಯಿ ವೇತನ ನೀಡುವುದು ದೋಣಿಗಳ ಮಾಲೀಕರಿಗೂ ಕಷ್ಟ. ಈ ಬಾರಿ ಮೀನುಗಾರಿಕೆಯೇ ಇಲ್ಲದ ಪರಿಣಾಮ ಅವಧಿಗೆ ಮೊದಲೇ ಕಾರ್ಮಿಕರು ಊರಿಗೆ ಮರಳಿದ್ದಾರೆ’ ಎಂದು ರಾಜು ತಾಂಡೇಲ ಸಮಸ್ಯೆ ವಿವರಿಸುತ್ತಾರೆ.