ಜನತಾ ದಳದಿಂದ ಪ್ರಧಾನಿಯಾಗಿದ್ದ ವಿಶ್ವನಾಥ್‌ ಪ್ರತಾಪ್‌ ಸಿಂಗ್‌ (ವಿ.ಪಿ ಸಿಂಗ್‌) ಅವರು 1989 ರಿಂದ 1990ರ ವರೆಗೆ ಅಧಿಕಾರದಲ್ಲಿದ್ದರು. ನ್ಯಾಷನಲ್‌ ಫ್ರಂಟ್‌ ಎನ್ನುವ ಹಲವು ಪಕ್ಷಗಳ ಒಕ್ಕೂಟದಿಂದ ಪ್ರಧಾನಿಯಾಗಿದ್ದರು. ಬಿಜೆಪಿ ಕೂಡ ಅವರಿಗೆ ಬೆಂಬಲ ನೀಡಿತ್ತು. ರಾಮ ಮಂದಿರ ವಿವಾದ ಸಂಬಂಧ ಅವರ ಸರ್ಕಾರಕ್ಕೆ ನೀಡಿದ ಬೆಂಬಲವನ್ನು ಬಿಜೆಪಿ ಹಿಂಪಡೆಯಿತು. ವಿಶ್ವಾಸಮತ ಸಾಬೀತು ಪಡಿಸಲು ವಿ.ಪಿ ಸಿಂಗ್ ವಿಫಲರಾದರು. 142-346 ಮತಗಳಿಂದ ಸೋಲು ಅನುಭವಿಸಿ ಅಧಿಕಾರ ಕಳೆದುಕೊಂಡರು.

ಜನತಾದಳದಿಂದ ಪ್ರಧಾನ ಮಂತ್ರಿಯಾಗಿದ್ದ ಕರ್ನಾಟಕ ಎಚ್‌.ಡಿ ದೇವೇಗೌಡರು ಕೂಡ ವಿಶ್ವಾಸಮತ ಸಾಬೀತು ಪಡಿಸಲಾಗದೆಯೇ ಪ್ರಧಾನಿ ಹುದ್ದೆಯಿಂದ ನಿರ್ಗಮಿಸಬೇಕಾಗಿ ಬಂತು. 1996 ರಲ್ಲಿ ಕಾಂಗ್ರೆಸ್‌ ಬೆಂಬಲದಿಂದ ‘ಸಂಯುಕ್ತ ರಂಗ‘ ಸರ್ಕಾರದ ಪ್ರಧಾನಮಂತ್ರಿಯಾದರು. 11 ತಿಂಗಳಿನಲ್ಲಿ ನೀಡಿದ್ದ ಬೆಂಬಲವನ್ನು ಕಾಂಗ್ರೆಸ್‌ ಹಿಂಪಡೆಯಿತು. 1997 ಏಪ್ರಿಲ್‌ 11 ರಂದು ದೇವೇಗೌಡರ ಸರ್ಕಾರದ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡಿಸಲಾಯಿತು. ಸರ್ಕಾರದ ಪರವಾಗಿ ಕೇವಲ 158 ಮತಗಳಷ್ಟೇ ಬಿದ್ದವು. ದೇವೇಗೌಡರು ಪ್ರಧಾನಮಂತ್ರಿ ಹುದ್ದೆಯಿಂದ ಕೆಳಗಿಳಿದರು. ಈವರೆಗೂ ಕನ್ನಡಿಗರೊಬ್ಬರು ದೇಶದ ಪ್ರಧಾನಮಂತ್ರಿಯಾಗಿದ್ದು ಅದೇ ಮೊದಲು ಹಾಗೂ ಕೊನೆ.

ಬಿಜೆಪಿಯ ಧುರೀಣ ಆಟಲ್‌ ಬಿಹಾರಿ ವಾಜಪೇಯಿ ಅವರ ವಿರುದ್ಧ ಎರಡು ಬಾರಿ ಅವಿಶ್ವಾಸ ನಿರ್ಣಯ ಮಂಡನೆಯಾಗಿತ್ತು. 1999ರಲ್ಲಿ ಜಯಲಲಿತಾ ನೇತೃತ್ವದ ಎಐಎಡಿಎಂಕೆ ವಾಜಪೇಯಿ ಸರ್ಕಾರಕ್ಕೆ ನೀಡಿದ್ದ ಬೆಂಬಲ ವಾಪಸ್‌ ಪಡೆದ ಪರಿಣಾಮ ಅವಿಶ್ವಾಸ ಎದುರಿಸಬೇಕಾಯಿತು. ಕೇವಲ 1 ಮತದಿಂದ ಸರ್ಕಾರಕ್ಕೆ ಸೋಲಾಯಿತು. 2003ರಲ್ಲಿ ಮತ್ತೆ ವಾಜಪೇಯಿ ಸರ್ಕಾರದ ವಿರುದ್ಧ ಅವಿಶ್ವಾಸ ನಿರ್ಣಯ ಮಂಡಿಸಲಾಯಿತಾದರೂ, ಭಾರೀ ಬಹುಮತದಿಂದ ಗೆದ್ದರು.