ಮೈಸೂರು ದಸರೆಯಲ್ಲಿ ಮಕ್ಕಳ ಕಲರವ

ಮೈಸೂರು: ವೈವಿಧ್ಯಮಯ ನೃತ್ಯ ಪ್ರದರ್ಶನ. ಚಿಣ್ಣರ ಪ್ರತಿಭೆ ಅನಾವರಣ. ಗಮನಸೆಳೆದ ಶೈಕ್ಷಣಿಕ ವಸ್ತು ಪ್ರದರ್ಶನ. ಸಾಧಕರಿಗೆ ಸನ್ಮಾನ. ಪೋಷಕರ ಕರತಾಡನ.

–ನಗರದ ಕಲಾಮಂದಿರದಲ್ಲಿ ನಾಡಹಬ್ಬ ಮೈಸೂರು ದಸರಾ ಮಹೋತ್ಸವ–2024 ಮಹಿಳಾ ಮತ್ತು ಮಕ್ಕಳ ದಸರಾ ಉಪಸಮಿತಿಯಿಂದ ಭಾನುವಾರ ನಡೆದ ಮಕ್ಕಳ ದಸರಾದಲ್ಲಿ ಕಂಡಬಂದ ನೋಟಗಳಿವು.

ದಸರಾ ಸಂಭ್ರಮದಲ್ಲಿ ಮಕ್ಕಳು ವಿವಿಧ ಕಲಾಪ್ರಾಕಾರಗಳ ನೃತ್ಯ ರೂಪಕ ಪ್ರದರ್ಶಿಸಿ ನೋಡುಗರಿಗೆ ರಸದೌತಣ ಉಣಬಡಿಸಿದರು. ನಾನಾ ಬಗೆಯ ವೇಷಭೂಷಣ ಧರಿಸಿ ಗಮನಸೆಳೆದರು.

ನೃತ್ಯ ವೈಭವ, ಜಾನಪದ ಗೀತೆಗಳ ಸಮೂಹ ಗಾಯನ, ಮಿಮಿಕ್ರಿ, ವಿಜ್ಞಾನ ನಾಟಕ, ದೇಶಭಕ್ತಿ ಗೀತೆ ಗಾಯನ, ಭರತನಾಟ್ಯ ಸೇರಿದಂತೆ ನಾನಾ ಸಾಂಸ್ಕೃತಿಕ ಕಾರ್ಯಕ್ರಮದ ಮೂಲಕ ನೆರೆದಿದ್ದವರ ಮನರಂಜಿಸಿದರು.

ಶೈಕ್ಷಣಿಕ ವಸ್ತುಪ್ರದರ್ಶನ: ಎಚ್‌.ಡಿ.ಕೋಟೆ ತಾಲ್ಲೂಕಿನಿಂದ ಸಸ್ಯ ಸಿರಿ (ಔಷಧ ಸಸ್ಯಗಳು), ಹುಣಸೂರು ತಾಲ್ಲೂಕಿನಿಂದ ಶಿಕ್ಷಣ ಇಲಾಖೆಯ ಪ್ರೋತ್ಸಾಹದಾಯಕ ಯೋಜನೆಗಳು ಮತ್ತು ಕಾರ್ಯಕ್ರಮಗಳು, ಕೆ.ಆರ್.ನಗರ ತಾಲ್ಲೂಕಿನಿಂದ ಸುಗ್ಗಿ ಸಿರಿ (ಸಿರಿ ಧಾನ್ಯಗಳ ಮಹತ್ವ ಪೌಷ್ಟಿಕ ಆಹಾರ), ಮೈಸೂರು ಉತ್ತರದಿಂದ ಕರ್ನಾಟಕದ ಜಾನಪದ ಕಲೆಗಳು, ಮೈಸೂರು ದಕ್ಷಿಣದಿಂದ ಮೈಸೂರು ರಾಜರ ಪರಂಪರೆ, ಮೈಸೂರು ತಾಲ್ಲೂಕಿನಿಂದ ವಿಜ್ಞಾನ ಮತ್ತು ತಂತ್ರಜ್ಞಾನ, ನಂಜನಗೂಡು ತಾಲ್ಲುಕಿನಿಂದ ನಾವೀನ್ಯಯುತವಾದ ಗಣಿತ ಮತ್ತು ವಿಜ್ಞಾನ ಪ್ರಯೋಗ ವಸ್ತುಪ್ರದರ್ಶನ ನಡೆಯಿತು.

ಪಿರಿಯಾಪಟ್ಟಣ ತಾಲ್ಲೂಕಿನಿಂದ ಕರ್ನಾಟಕ ಇತಿಹಾಸ, ತಿ.ನರಸೀಪುರ ತಾಲ್ಲೂಕಿನಿಂದ ಮೈಸೂರಿನ ವಿಶೇಷತೆ, ನೇತಾಜಿ ಸುಭಾಷ್ ಚಂದ್ರಬೋಸ್‌ ಆವಾಸೀಯ ಶಾಲೆಯಿಂದ ಕರಕುಶಲ ಕಲೆಗಳ ಪ್ರದರ್ಶನ, ಕೆ.ಆರ್.ನಗರ, ನಂಜನಗೂಡು, ಹುಣಸೂರು ಮತ್ತು ತಿ.ನರಸೀಪುರ ತಾಲ್ಲೂಕಿನ ಕಸ್ತೂರಬಾ ಗಾಂಧಿ ಬಾಲಿಕ ವಿದ್ಯಾಲಯದಿಂದ ವಿವಿಧ ಕರಕುಶಲ ವಸ್ತುಗಳ ಪ್ರದರ್ಶನ ಗಮನಸೆಳೆಯಿತು.

‘ಮಕ್ಕಳ ದಸರಾದಲ್ಲಿ ಪಾಲ್ಗೊಂಡಿರುವುದಕ್ಕೆ ಖುಷಿ ಇದೆ. ಪ್ರದರ್ಶನದಲ್ಲಿ ಎಲ್ಲರೂ ನಾನು ನಿರ್ಮಿಸಿದ ಡ್ರೋನ್ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಪ್ರತಿಭೆ ಅನಾವರಣಕ್ಕೆ ಇದೊಂದು ವೇದಿಕೆಯಾಗಿದೆ’ ಎಂದು ಹೂಟಗಳ್ಳಿ ಸರ್ಕಾರಿ ಶಾಲೆಯ ವಿದ್ಯಾರ್ಥಿ ರಾಜೇಶ್ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದರು.

ಶಾಸಕ ಟಿ.ಎಸ್‌.ಶ್ರೀವತ್ಸ, ಜಿಲ್ಲಾಧಿಕಾರಿ ಜಿ.ಲಕ್ಷ್ಮೀಕಾಂತರೆಡ್ಡಿ, ಡಿಡಿಪಿಐ ಎಸ್‌.ಟಿ. ಜವರೇಗೌಡ, ಮಹಿಳಾ ಮತ್ತು ಮಕ್ಕಳ ದಸರಾ ಉಪ ಸಮಿತಿ ಅಧ್ಯಕ್ಷೆ ಭಾಗ್ಯಲಕ್ಷ್ಮಿ ನಿಂಗರಾಜು, ಉಪ ವಿಶೇಷ ಅಧಿಕಾರಿ ವಿ.ಪ್ರಿಯದರ್ಶಿನಿ ಉಪಸ್ಥಿತರಿದ್ದರು.