ಈ ಸಲದ ಚುನಾವಣೆಯಲ್ಲಿ ಡೆಮಾಕ್ರಟಿಕ್‌ ಪಕ್ಷದ ಕಮಲಾ ಹ್ಯಾರಿಸ್‌ (60 ವರ್ಷ) ಮತ್ತು ರಿಪಬ್ಲಿಕನ್‌ ಪಕ್ಷದ ಅಭ್ಯರ್ಥಿ ಡೊನಾಲ್ಡ್‌ ಟ್ರಂಪ್‌ (78 ವರ್ಷ) ನಡುವೆ ನೇರ ಹಣಾಹಣಿ ಇದ್ದರೂ, ಅಧ್ಯಕ್ಷೀಯ ಹುದ್ದೆಯ ಸ್ಪರ್ಧೆಯಲ್ಲಿ ಇನ್ನೂ ಮೂವರು ಅಭ್ಯರ್ಥಿಗಳಿದ್ದಾರೆ. ಲಿಬರ್ಟೇರಿಯನ್‌ ಪಾರ್ಟಿಯಿಂದ ಚೇಸ್‌ ಒಲಿವರ್‌ (39 ವರ್ಷ) ಮತ್ತು ಗ್ರೀನ್‌ ಪಾರ್ಟಿಯಿಂದ ಜಿಲ್‌ ಸ್ಟೇನ್‌ (74 ವರ್ಷ) ಕಣಕ್ಕಿಳಿಸಿದ್ದಾರೆ. ಈ ಹಿಂದೆ ಗ್ರೀನ್‌ ಪಾರ್ಟಿಯಲ್ಲಿ ಗುರುತಿಸಿಕೊಂಡಿದ್ದ ಕಾರ್ನೆಲ್‌ ವೆಸ್ಟ್‌ (71 ವರ್ಷ) ಅವರು ಸ್ವತಂತ್ರ ಅಭ್ಯರ್ಥಿಯಾಗಿ ಅಖಾಡಕ್ಕೆ ಇಳಿದಿದ್ದಾರೆ.

ನ್ಯೂಯಾರ್ಕ್‌ನಲ್ಲಿ ನಡೆಯುವ ಮತದಾನದಲ್ಲಿ ಬಳಸಲಾಗುತ್ತಿರುವ ಮತಪತ್ರಗಳಲ್ಲಿ ಬಂಗಾಳಿ ಭಾಷೆಯಲ್ಲೂ ವಿವರಗಳನ್ನು ಮುದ್ರಿಸಲಾಗುತ್ತದೆ. ಇಂಗ್ಲಿಷ್‌, ಬಂಗಾಳಿ ಮಾತ್ರವಲ್ಲದೆ ಚೀನಿ, ಸ್ಪ್ಯಾನಿಶ್‌ ಮತ್ತು ಕೊರಿಯಾ ಭಾಷೆಗಳಲ್ಲೂ ಮತಪತ್ರಗಳನ್ನು ಮುದ್ರಿಸಲಾಗುತ್ತದೆ. ಅದು ಕಾನೂನು ಪ್ರಕಾರ ತೆಗೆದುಕೊಳ್ಳುತ್ತಿರುವ ಅನಿವಾರ್ಯ ಕ್ರಮವಾಗಿದೆ. ಕಾನೂನಿನ ಪ್ರಕಾರ, ನ್ಯೂಯಾರ್ಕ್‌ ಸಿಟಿಯ ಕೆಲವು ಕಡೆಗಳಲ್ಲಿ ಬಂಗಾಳಿ ಭಾಷೆಯಲ್ಲಿ ಮತಪತ್ರಗಳನ್ನು ಮುದ್ರಿಸುವುದು ಕಡ್ಡಾಯ. ಮತಪತ್ರ ಮಾತ್ರವಲ್ಲ, ಬಂಗಾಳಿ ಮಾತನಾಡುವ ಮತದಾರರಿಗೆ ಅನುಕೂಲ ಕಲ್ಪಿಸುವುದಕ್ಕಾಗಿ ಇತರೆ ಚುನಾವಣಾ ಪರಿಕರಗಳಲ್ಲೂ ಬಂಗಾಳಿಯಲ್ಲಿ ವಿವರ ಇರಬೇಕಾಗಿದೆ. ಭಾರತದಲ್ಲಿ ಬಳಕೆಯಲ್ಲಿರುವ ಭಾಷೆಯನ್ನು ಚುನಾವಣಾ ಪ್ರಕ್ರಿಯೆಯಲ್ಲಿ ಬಳಸುವ ಬಗ್ಗೆ ಈ ಹಿಂದೆ ಕಾನೂನು ಹೋರಾಟ ನಡೆದಿತ್ತು. ಅಂತಿಮವಾಗಿ ಬಂಗಾಳಿ ಭಾಷೆಯನ್ನು ಆಯ್ಕೆ ಮಾಡಲಾಗಿತ್ತು. 2013ರಿಂದ ಮತಪತ್ರದಲ್ಲಿ ಬಂಗಾಳಿಯನ್ನೂ ಬಳಸಲಾಗುತ್ತಿದೆ.