ಇರಾನ್‌ ದಾಳಿಗೆ ಜಿ–7 ರಾಷ್ಟ್ರಗಳ ಆತಂಕ: ವಿಶ್ವಸಂಸ್ಥೆ ಭದ್ರತಾ ಮಂಡಳಿ ತುರ್ತು ಸಭೆ

ವಾಷಿಂಗ್ಟನ್: ಇಸ್ರೇಲ್‌ನ ಮನವಿಗೆ ಸ್ಪಂದಿಸಿರುವ ವಿಶ್ವಸಂಸ್ಥೆಯ ಭದ್ರತಾ ಮಂಡಳಿ ಇರಾನ್‌ ದಾಳಿ ನಂತರ ತುರ್ತು ಸಭೆ ನಡೆಸಿತು. ಇಸ್ರೇಲ್‌ನ ಕೋರಿಕೆಯಂತೆ ಮಧ್ಯಪ್ರಾಚ್ಯದ ಸ್ಥಿತಿಯ ಬಗೆಗೆ ಚರ್ಚಿಸಲು ಸಭೆ ನಡೆಯಿತು. ಭದ್ರತಾ ಮಂಡಳಿ ಪ್ರಧಾನ ಕಾರ್ಯದರ್ಶಿ ಆ್ಯಂಟೊನಿಯೊ ಗುಟೆರೆಸ್ ವಸ್ತುಸ್ಥಿತಿ ಕುರಿತು ಸಭೆಗೆ ಮಾಹಿತಿ ನೀಡಿದರು ಎಂದು ವರದಿ ತಿಳಿಸಿದೆ. ‘ಇರಾನ್‌ನ ದಾಳಿ ಅಂತರರಾಷ್ಟ್ರೀಯ ಕಾಯ್ದೆಯ ಉಲ್ಲಂಘನೆ. ಪ್ರಾದೇಶಿಕವಾಗಿ ಇದು ಅಸ್ಥಿರತೆ ಮೂಡಿಸಲಿದೆ. ಐಆರ್‌ಜಿಸಿ (ಇಸ್ಲಾಮಿಕ್‌ ರೆವಲ್ಯೂಷನರಿ ಗಾರ್ಡ್‌ ಕೋರ್) ಅನ್ನು ಉಗ್ರರ ಸಂಘಟನೆಯೆಂದು ಘೋಷಿಸಬೇಕು’ ಎಂದು ಇಸ್ರೇಲ್‌ ಒತ್ತಾಯಿಸಿದೆ. ಇರಾನ್‌ ಸಮರ್ಥನೆ: ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಗೆ ಪತ್ರ ಬರೆದಿರುವ ಇರಾನ್‌ ದಾಳಿ ನಡೆಸಿದ ತನ್ನ ಕ್ರಮವನ್ನು ಸಮರ್ಥಿಸಿಕೊಂಡಿದೆ. ವಿಶ್ವಸಂಸ್ಥೆ ಒಪ್ಪಂದದ ವಿಧಿ 51ರ ಅನ್ವಯ ಸ್ವಯಂ ರಕ್ಷಣೆ ಕ್ರಮವಾಗಿ ಈ ದಾಳಿ ನಡೆಸಿದ್ದಾಗಿ ಪತ್ರದಲ್ಲಿ ತಿಳಿಸಿದೆ. ಏ. 13ರಂದು ಪತ್ರ ಬರೆದಿದ್ದು ಡಾಮಾಸ್ಕಸ್‌ನ ಇರಾನ್‌ನ ತಾಣದ ಮೇಲೆ ಏ. 1ರಂದು ನಡೆಸಿದ್ದ ದಾಳಿಗೆ ಪ್ರತೀಕಾರವಾಗಿ ದಾಳಿ ನಡೆಸಲಾಗಿದೆ ಎಂದು ಸಮರ್ಥನೆ ನೀಡಿದೆ. ಏ. 1ರಂದು ನಡೆದಿದ್ದ ದಾಳಿಯಲ್ಲಿ ಐಆರ್‌ಜಿಸಿಯ ಹಲವು ಹಿರಿಯ ಕಮಾಂಡರ್‌ಗಳು ಹತರಾಗಿದ್ದರು.

ವಾಷಿಂಗ್ಟನ್: ಇಸ್ರೇಲ್‌ ಗುರಿಯಾಗಿಸಿ ಇರಾನ್‌ ಪ್ರಯೋಗಿಸಿದ್ದ 80ಕ್ಕೂ ಅಧಿಕ ಯುಎವಿ ಮತ್ತು ಕನಿಷ್ಠ 6 ಕ್ಷಿಪಣಿಗಳನ್ನು ಅಮೆರಿಕ ಸೇನೆಯು ಹೊಡೆದುರುಳಿಸಿದೆ.  ಹುತಿ ನಿಯಂತ್ರಣದಲ್ಲಿರುವ ಯೆಮನ್‌ನ ಪ್ರದೇಶದಲ್ಲಿ ಈ ಪ್ರತಿದಾಳಿ ನಡೆದಿದೆ ಎಂದು ಅಮೆರಿಕ ಸೇನೆಯ ಕೇಂದ್ರ ಕಮಾಂಡ್ ಪ್ರತಿಕ್ರಿಯಿಸಿದೆ. ಇರಾನ್‌ 300ಕ್ಕೂ ಅಧಿಕ ಡ್ರೋನ್ ಕ್ಷಿಪಣಿಗಳನ್ನು ಪ್ರಯೋಗಿಸಿತ್ತು.

ಇಸ್ಲಾಮಾಬಾದ್: ಮಧ್ಯಪ್ರಾಚ್ಯ ಪ್ರಾಂತ್ಯದಲ್ಲಿನ ಬಿಗುವಿನ ಸ್ಥಿತಿ ನಡುವೆಯೂ ಇರಾನ್ ಅಧ್ಯಕ್ಷ ಇಬ್ರಾಹಿಂ ರೈಸಿ ಇದೇ 22ರಂದು ಪಾಕಿಸ್ತಾನಕ್ಕೆ ಭೇಟಿ ನೀಡುವರು.  ಪಾಕ್‌ನ ಪ್ರಧಾನಿ ಶೆಹಬಾಜ್‌ ಷರೀಫ್ ಅಧ್ಯಕ್ಷ ಆಸಿಫ್ ಅಲಿ ಜರ್ದಾರಿ ಹಾಗೂ ಸೇನಾ ಮುಖ್ಯಸ್ಥರ ಜೊತೆಗೆ ಚರ್ಚಿಸುವರು ಎಂದು ಮಾಧ್ಯಮ ವರದಿಗಳು ತಿಳಿಸಿವೆ. ಇರಾನ್–ಪಾಕಿಸ್ತಾನ ನಡುವಣ ಬಾಂಧವ್ಯಕ್ಕೆ ವರ್ಷಾರಂಭದಲ್ಲಿ ಹಿನ್ನಡೆ ಆಗಿತ್ತು. ಇದು ಹಾಗೂ ಸದ್ಯ ಮೂಡಿರುವ ಬಿಗುವಿನ ಸ್ಥಿತಿ ಹಿನ್ನೆಲೆಯಲ್ಲಿ ಈ ಭೇಟಿ ಮಹತ್ವ ಪಡೆದಿದೆ. ಜನವರಿ ತಿಂಗಳಲ್ಲಿ ಇರಾನ್‌ ಕೈಗೊಂಡಿದ್ದ ಕ್ರಮಕ್ಕೆ ಪ್ರತೀಕಾರವಾಗಿ ಅಲ್ಲಿನ ವ್ಯಾಪ್ತಿಯ ಪ್ರದೇಶಗಳಲ್ಲಿನ ಉಗ್ರರ ನೆಲೆಯನ್ನು ಗುರಿಯಾಗಿಸಿ ಪಾಕಿಸ್ತಾನವು ದಾಳಿ ನಡೆಸಿತ್ತು.