ಇಸ್ರೇಲ್ ಮೇಲೆ ಹಿಜ್ಬುಲ್ಲಾ ಡ್ರೋನ್ ದಾಳಿ: ಲೆಬನಾನ್ ಮೇಲೆ ಇಸ್ರೇಲ್ ಪ್ರತಿ ದಾಳಿ

ಲೆಬನಾನ್‌ನ ಹಿಜ್ಬುಲ್ಲಾ ಸಂಘಟನೆಯ ಸಂಸ್ಥಾಪಕ, ಕಮಾಂಡರ್‌ ಫೌವಾದ್‌ ಶುಕುರ್‌, ‘ಇಸ್ರೇಲ್‌ ಸೇನೆಯು ಹತ್ಯೆ ಮಾಡಿದ್ದಕ್ಕೆ ಪ್ರತೀಕಾರವಾಗಿ ಇಸ್ರೇಲ್‌ನ ವಿವಿಧ ನಗರಗಳನ್ನು ಗುರಿಯಾಗಿರಿಸಿಕೊಂಡು 320ಕ್ಕೂ ಕತ್ಯುಸಾ ರಾಕೆಟ್‌, ಡ್ರೋನ್‌ ದಾಳಿ ನಡೆಸಿದ್ದೇವೆ. ಅಲ್ಲಿನ ಸೇನೆಯನ್ನು ಗುರಿಯಾಗಿರಿಸಿಕೊಂಡು, ದಾಳಿ ನಡೆಸಿದ್ದು, ಪ್ರತೀಕಾರದ ಮೊದಲ ಹಂತವಾಗಿದೆ’ ಎಂದು ಘೋಷಿಸಿದ್ದಾರೆ.

ಹಿಜ್ಬುಲ್ಲಾಗಳಿಂದ ರಾಕೆಟ್‌ ದಾಳಿ ಆರಂಭವಾಗುತ್ತಿದ್ದಂತೆಯೇ, ಉತ್ತರ ಇಸ್ರೇಲ್‌ನಾದ್ಯಂತ ಎಚ್ಚರಿಕೆ ಸಂದೇಶವಾಗಿ ಸೈರನ್‌ಗಳು ಮೊಳಗಿದವು. ಮುಂಜಾಗ್ರತಾ ಕ್ರಮವಾಗಿ ಒಂದು ಗಂಟೆ ಬೆನ್‌– ಗುರಿಯಾನ್‌ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಮುಚ್ಚಲಾಗಿತ್ತು. ನಾಗರಿಕರಿಗೂ ಬಾಂಬ್‌ ನಿರೋಧಕ ಅಡಗುತಾಣಗಳಲ್ಲಿ ಇರುವಂತೆ ಇಸ್ರೇಲ್‌ ಸೇನೆ ಸೂಚಿಸಿತ್ತು.

ದಕ್ಷಿಣ ಲೆಬನಾನ್‌ ಮೇಲೆ ಇಸ್ರೇಲ್‌ ವಾಯುದಾಳಿಯಿಂದ ಸಿರಿಯಾದ 17 ವರ್ಷದ ವ್ಯಕ್ತಿಯೊಬ್ಬರು ಗಾಯಗೊಂಡು ಆಸ್ಪತ್ರೆಗೆ ದಾಖಲಾಗಿದ್ದಾರೆ’ ಎಂದು ಲೆಬನಾನ್‌ನ ಆರೋಗ್ಯ ಇಲಾಖೆ ತಿಳಿಸಿದೆ.

ಎರಡೂ ರಾಷ್ಟ್ರಗಳಲ್ಲಿ ಪರಿಸ್ಥಿತಿ ಗಂಭೀರವಾಗಿದ್ದು, ಸಾವು–ನೋವು, ಹಾನಿಯ ಕುರಿತು ಇದುವರೆಗೂ ಯಾವುದೇ ಮಾಹಿತಿ ಲಭ್ಯವಾಗಿಲ್ಲ.

ಸಂಧಾನ ಮಾತುಕತೆ:

ಮತ್ತೊಂದೆಡೆ, ಇಸ್ರೇಲ್‌ ಹಾಗೂ ಹಮಾಸ್‌ ಬಂಡುಕೋರರ ನಡುವೆ ನಡೆಯುತ್ತಿರುವ ಯುದ್ಧವನ್ನು ಕೊನೆಗಾಣಿಸಲು ಈಜಿಪ್ಟ್‌ ಮತ್ತೊಂದು ಸುತ್ತಿನ ಮಾತುಕತೆ ನಡೆಸಿತು. ಈಜಿಪ್ಟ್‌ ಅಧ್ಯಕ್ಷ ಅಬ್ದೆಲ್‌ ಫತ್ತಾ ಅಲ್‌– ಶಿಸಿ ಹಾಗೂ ಅಮೆರಿಕ ಸೇನೆಯ ಜಂಟಿ ಅಧ್ಯಕ್ಷ ಚಾರ್ಲ್ಸ್‌ ಬ್ರೌನ್‌ ನೇತೃತ್ವದಲ್ಲಿ ಕೈರೊ ನಗರದಲ್ಲಿ ಭಾನುವಾರ ಸಭೆ ನಡೆಯಿತು. ಗಾಜಾದಲ್ಲಿ ಕದನ ವಿರಾಮ ಒಪ್ಪಂದ ಯಶಸ್ವಿಯಾದರೆ, ದಾಳಿಗಳನ್ನು ನಿಲ್ಲಿಸಲಾಗುವುದು ಎಂದು ಲೆಬನಾನ್‌ನ ಹಿಜ್ಬುಲ್ಲಾ ತಿಳಿಸಿದೆ.

ಮತ್ತೊಂದೆಡೆ, ಸಿರಿಯಾ, ಇರಾಕ್‌, ಯೆಮೆನ್‌ನಲ್ಲಿರುವ ಬಂಡುಕೋರ ಗುಂಪುಗಳಿಗೆ ಇರಾನ್‌ ತನ್ನ ಬೆಂಬಲ ಘೋಷಿಸಿದ್ದು, ಹೋರಾಟ ಮತ್ತಷ್ಟು ತೀವ್ರ ಸ್ವರೂಪ ಪಡೆಯುವ ಸಾಧ್ಯತೆಗಳಿವೆ.

ವಿಮಾನ ಸಂಚಾರ ರದ್ದು: ‘ಇಸ್ರೇಲ್‌ನ ಟೆಲ್‌ ಅವೀವ್‌, ಲೆಬನಾನ್‌ನ ಬೈರೂತ್‌ ನಗರಕ್ಕೆ ತೆರಳುವ ಎಲ್ಲ ವಿಮಾನಗಳ ಹಾರಾಟವನ್ನು ಸೋಮವಾರದವರೆಗೆ ರದ್ದುಗೊಳಿಸಲಾಗಿದೆ’ ಎಂದು ಏರ್‌ ಫ್ರಾನ್ಸ್‌ ಕಂಪನಿ ತಿಳಿಸಿದೆ.

‘ಈ ಮಾರ್ಗದಲ್ಲಿ ಮತ್ತೆ ಸಂಚಾರ ಆರಂಭಿಸುವ ಕುರಿತಂತೆ ಹೊಸತಾಗಿ ಭದ್ರತಾ ಪರಿಶೀಲನೆ ನಡೆಸಿದ ನಂತರ ವಿಮಾನಗಳ ಹಾರಾಟದ ಬಗ್ಗೆ ನಿರ್ಧರಿಸಲಾಗುವುದು’ ಎಂದು ಏರ್‌ಲೈನ್ಸ್ ಸಂಸ್ಥೆಯು ಪ್ರಕಟಣೆಯಲ್ಲಿ ತಿಳಿಸಿದೆ. ಜರ್ಮನ್‌ನ ಪ್ರಮುಖ ಏರ್‌ಲೈನ್ಸ್‌ ಸಂಸ್ಥೆ ‘ಲುಫ್ತಾನ್ಸಾ’ ಕೂಡ ಸೆಪ್ಟೆಂಬರ್‌ 2ರ ತನಕ ಟೆಲ್‌ ಅವೀವ್‌, ಬೈರೂತ್‌ ನಗರಕ್ಕೆ ವಿಮಾನ ಹಾರಾಟವನ್ನು ರದ್ದುಗೊಳಿಸಿದೆ ಎಂದು ತಿಳಿಸಿದೆ.

ವಾಯುದಾಳಿಗೂ ಮುನ್ನ ಏನಾಯ್ತು?

• ಜುಲೈ 30ರಂದು ಲೆಬನಾನ್‌ ಹಿಜ್ಬುಲ್ಲಾದ ಸಂಸ್ಥಾಪಕ, ಕಮಾಂಡರ್‌ ಫುವದ್‌ ಶೂಕುರ್‌ನನ್ನು ಹತ್ಯೆ ಮಾಡಿದ್ದ ಇಸ್ರೇಲ್‌ ಸೇನೆ

• ಕಳೆದೊಂದು ತಿಂಗಳಿನಿಂದ ಎರಡು ರಾಷ್ಟ್ರಗಳ ನಡುವೆ ದಾಳಿ– ಪ್ರತಿದಾಳಿ

• ಫುವದ್‌ ಹತ್ಯೆಗೆ ಪ್ರತೀಕಾರವಾಗಿ ದಾಳಿಯ ಎಚ್ಚರಿಕೆ ನೀಡಿದ್ದ ಹಿಜ್ಬುಲ್ಲಾ

• ಭಾನುವಾರ ಬೆಳಿಗ್ಗೆ ಲೆಬನಾನ್‌ನ ಗಡಿಭಾಗ, ದಕ್ಷಿಣ ಲೆಬನಾನ್‌ ನಗರಗಳ ಮೇಲೆ ಇಸ್ರೇಲ್‌ ವಾಯುದಾಳಿ

• ಇಸ್ರೇಲ್‌ನ 100ಕ್ಕೂ ಅಧಿಕ ಯುದ್ಧವಿಮಾನಗಳಿಂದ ಕಾರ್ಯಾಚರಣೆ

• ಪ್ರತಿದಾಳಿ ನಡೆಸಿದ ಹಿಜ್ಬುಲ್ಲಾ; 300ಕ್ಕೂ ಅಧಿಕ ರಾಕೆಟ್‌ಗಳ ದಾಳಿ

• ಇಸ್ರೇಲ್‌, ಲೆಬನಾನ್‌ನಲ್ಲಿ ವಾಯುಸಂಚಾರ ವ್ಯತ್ಯ

(ವಿವಿಧ ಏಜೆನ್ಸಿಗಳ ಮಾಹಿತಿ ಆಧರಿಸಿದ ಸುದ್ದಿ)