15 ದಿನಗಳಲ್ಲಿ ಸಿಎಂ ಸಿದ್ದರಾಮಯ್ಯ ರಾಜೀನಾಮೆ: ಬಿ.ಎಸ್‌ ಯಡಿಯೂರಪ್ಪ

‘ಅನುದಾನ ಕೊಡದೇ ಹೋದರೆ ಗ್ಯಾರಂಟಿಗಳು ನಿಲ್ಲುತ್ತವೆ ಎಂಬ ದುರುದ್ದೇಶದಿಂದ ಕೇಂದ್ರ ಸರ್ಕಾರವು ರಾಜ್ಯಕ್ಕೆ ನೀಡಬೇಕಾದ ಬಾಕಿ ಅನುದಾನ ನೀಡದೇ ವಂಚಿಸುತ್ತಿದೆ’ ಎಂದು ಮುಖ್ಯಮಂತ್ರಿ ಸಿದ್ದರಾಮಯ್ಯ ಆರೋಪಿಸಿದರು. ಸಂಡೂರು ವಿಧಾನಸಭಾ ಕ್ಷೇತ್ರದ ಬನ್ನಿಹಟ್ಟಿ ಏಳುಬೆಂಚಿ ಕುಡುತಿನಿಯಲ್ಲಿ ಶುಕ್ರವಾರ ಅವರು ಪ್ರಚಾರ ನಡೆಸಿದ ಅವರು‘ದುಡ್ಡು ಕೊಡದಿದ್ದರೆ ಗ್ಯಾರಂಟಿಗಳನ್ನು ನಿಲ್ಲಿಸಿಬಿಡುತ್ತಾರೆ ಎಂದು ರಾಜ್ಯಕ್ಕೆ ನ್ಯಾಯವಾಗಿ ಬರಬೇಕಾದ ಅನುದಾನ ನಿರಾಕರಿಸಲಾಗುತ್ತಿದೆ.  ₹11495 ಕೋಟಿ ಕೇಂದ್ರದಿಂದ ನಮಗೆ ಬರಬೇಕಿತ್ತು. ಇದು ನಮ್ಮದೇ ಪಾಲಿನ ಹಣ. ಇದನ್ನು ರಾಜ್ಯಕ್ಕೆ ಕೊಡದೆ ವಂಚಿಸಿದ್ದಾರೆ. ಇದೂ ಸೇರಿ ಒಟ್ಟು ₹17 ಸಾವಿರ ಕೋಟಿ ನಮಗೆ ಕೇಂದ್ರ ಸರ್ಕಾರದಿಂದ ವಂಚನೆಯಾಗಿದೆ’ ಎಂದರು. ‘ನಮ್ಮ ಬಳಿ ಸಂಬಳ ಕೊಡೋಕೆ ಹಣವಿಲ್ಲ ಎಂದು ಮೋದಿ ಹೇಳುತ್ತಾರೆ. ಹಾಗಿದ್ದರೆ ಗ್ಯಾರಂಟಿಗಳಿಗೆ ನೀಡಿದ ₹56 ಸಾವಿರ ಕೋಟಿ ಎಲ್ಲಿಯದ್ದು? ಅಭಿವೃದ್ಧಿ ಕಾರ್ಯಗಳಿಗೆ ನೀಡಿದ ₹1.20 ಲಕ್ಷ ಕೋಟಿ ಎಲ್ಲಿಯದ್ದು? ಇದೆಲ್ಲಾ ಎಲ್ಲಿಂದ ಬಂತು ಮಿಸ್ಟರ್ ಮೋದಿ’ ಎಂದು ಪ್ರಶ್ನಿಸಿದರು ರೆಡ್ಡಿ ವಿರುದ್ಧ ವಾಗ್ದಾಳಿ: ಚುನಾವಣಾ ಪ್ರಚಾರದ ಪ್ರತಿ ಬಹಿರಂಗ ಸಭೆಯಲ್ಲೂ ಸಿದ್ದರಾಮಯ್ಯ ಅಕ್ರಮ ಗಣಿಗಾರಿಕೆಯ ಕಾಲದ ಘಟನಾವಳಿಗಳನ್ನು ನೆನಪಿಸಿದರು. ‘ಬಳ್ಳಾರಿ ಜಿಲ್ಲೆಯು ಪ್ರತ್ಯೇಕ ರಾಜ್ಯ ಎಂಬಂತಾಗಿತ್ತು.  ಅಂದು ಮುಖ್ಯಮಂತ್ರಿಯಾಗಿದ್ದ ಬಿ.ಎಸ್‌ ಯಡಿಯೂರಪ್ಪ ಅವರಿಗೇ ಇಲ್ಲಿ ಮರ್ಯಾದೆ ಸಿಗುತ್ತಿರಲಿಲ್ಲ. ಅಕ್ರಮ ಗಣಿಗಾರಿಕೆ ಪ್ರಶ್ನೆ ಮಾಡಿದ ನಮಗೆ ಬಳ್ಳಾರಿಗೆ ಬರುವಂತೆ ಸವಾಲು ಹಾಕಲಾಯಿತು. ಅದನ್ನು ಮೆಟ್ಟಿ ನಾವು ಬಳ್ಳಾರಿಗೆ ಪಾದಯಾತ್ರೆ ನಡೆಸಿದೆವು’ ಎಂದು ಹೇಳಿದರು. ‘ಹಿಂದಿನ ಕಹಿ ಘಟನೆಗಳು ಮರುಕಳಿಸಬಾರದು ಎಂದಾದರೆ ಬಳ್ಳಾರಿ ಶಾಂತವಾಗಿರಬೇಕಿದ್ದರೆ ಕಾಂಗ್ರೆಸ್‌ ಬೆಂಬಲಿಸಬೇಕು’ ಎಂದು ಅವರು ಮನವಿ ಮಾಡಿದರು.