ಮಣಿಪುರ | ಮತದಾನ ಬಹಿಷ್ಕಾರ: ಕುಕಿ ಸಂಘಟನೆಗಳ ನಿರ್ಧಾರ

ಔಟರ್ ಮಣಿಪುರ ಲೋಕಸಭಾ (ಎಸ್‌ಟಿ ಮೀಸಲು) ಕ್ಷೇತ್ರವನ್ನು ಇದುವರೆಗೆ ಆರು ನಾಗಾ ಮತ್ತು ಐವರು ಕುಕಿ ಮುಖಂಡರು ಪ್ರತಿನಿಧಿಸಿದ್ದಾರೆ. ಈ ಬಾರಿ ಕುಕಿಗಳು ಚುನಾವಣೆ ಬಹಿಷ್ಕರಿಸಿರುವುದರಿಂದ ಕಣದಲ್ಲಿ ನಾಗಾಗಳೇ ಇದ್ದಾರೆ.   ಔಟರ್ ಮಣಿಪುರದ ಎಂಟು ಲಕ್ಷ ಮತದಾರರ ಪೈಕಿ ನಾಗಾ ಮತದಾರರ ಸಂಖ್ಯೆ 4.61 ಲಕ್ಷ ಮತ್ತು ಕುಕಿ ಮತದಾರರ ಸಂಖ್ಯೆ 3.21 ಲಕ್ಷ ಆಗಿದೆ. ಚುನಾವಣಾ ಆಯೋಗದ ಪ್ರಕಾರ ನಿರಾಶ್ರಿತರ ಶಿಬಿರಗಳಲ್ಲಿ ಆಶ್ರಯ ಪಡೆದಿರುವ 24 ಸಾವಿರಕ್ಕೂ ಹೆಚ್ಚು ಮಂದಿ ಮತದಾನಕ್ಕೆ ಅರ್ಹರಾಗಿದ್ದು ಅವರಿಗಾಗಿ 94 ಮತಗಟ್ಟೆಗಳನ್ನು ಸ್ಥಾ‍ಪಿಸಲಾಗಿದೆ.

ಇಂಫಾಲ್: ಜನಾಂಗೀಯ ಹಿಂಸಾಚಾರದಿಂದ ಕೂಡಿರುವ ಮಣಿಪುರದಲ್ಲಿ ಎಲ್ಲ ಸಮುದಾಯಗಳನ್ನು ಜತೆಗೆ ಕೊಂಡೊಯ್ಯುವ ಮೂಲಕ ಶಾಂತಿ ಸ್ಥಾಪಿಸುವುದು ಬಿಜೆಪಿ ನೇತೃತ್ವದ ಕೇಂದ್ರ ಸರ್ಕಾರದ ಆದ್ಯತೆಯಾಗಿದೆ ಎಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಸೋಮವಾರ ಹೇಳಿದ್ದಾರೆ. ಇಂಫಾಲ್‌ನಲ್ಲಿ ನಡೆದ ಸಾರ್ವಜನಿಕ ಸಭೆಯಲ್ಲಿ ಮಾತನಾಡಿದ ಅವರು ‘ಲೋಕಸಭಾ ಚುನಾವಣೆಯು ಮಣಿಪುರವನ್ನು ಒಡೆಯಲು ಯತ್ನಿಸುತ್ತಿರುವ ಶಕ್ತಿಗಳು ಮತ್ತು ಅದನ್ನು ಒಗ್ಗಟ್ಟಾಗಿಯೇ ಇಡಲು ಪ್ರಯತ್ನಿಸುತ್ತಿರುವವರ ನಡುವೆ ನಡೆಯುತ್ತಿದೆ’ ಎಂದು ತಿಳಿಸಿದ್ದಾರೆ. ಈಶಾನ್ಯ ರಾಜ್ಯದ ಜನಸಂಖ್ಯೆಯನ್ನು ಏರುಪೇರು ಮಾಡಲು ಒಳನುಸುಳುವಿಕೆಯನ್ನು ಬೆಂಬಲಿಸಲಾಯಿತು ಎಂದು ಅವರು ಅಭಿಪ್ರಾಯಪಟ್ಟರು.