‘ಪಿಎಂ ಇ–ಡ್ರೈವ್‌’ಗೆ ಚಾಲನೆ: ಯೋಜನೆಗೆ ₹10,900 ಕೋಟಿ ನಿಗದಿ

‘ಪಿಎಂ ಇ–ಡ್ರೈವ್‌’ ಯೋಜನೆಯಡಿ ಎಲೆಕ್ಟ್ರಿಕ್‌ ದ್ವಿಚಕ್ರವಾಹನಗಳಿಗೆ ಅವುಗಳ ಬ್ಯಾಟರಿ ಸಾಮರ್ಥ್ಯ ಆಧಾರದ ಮೇಲೆ ಸಬ್ಸಿಡಿ ದೊರೆಯಲಿದೆ. ಪ್ರತಿ ಕೆಡಬ್ಲ್ಯುಎಚ್‌ಗೆ ₹5 ಸಾವಿರ ನಿಗದಿಪಡಿಸಲಾಗಿದೆ. ಮೊದಲ ವರ್ಷದಲ್ಲಿ ಗರಿಷ್ಠ ಸಬ್ಸಿಡಿ ₹10 ಸಾವಿರ ದಾಟುವಂತಿಲ್ಲ. ಎರಡನೇ ವರ್ಷದಲ್ಲಿ ಪ್ರತಿ ಕೆಡಬ್ಲ್ಯುಎಚ್‌ಗೆ ₹2500 ಪಾವತಿಸಲಾಗುತ್ತದೆ. ಈ ಮೊತ್ತವು ₹5 ಸಾವಿರ ದಾಟುವಂತಿಲ್ಲ. ಇ–ಆಟೊರಿಕ್ಷಾ ಸೇರಿ ತ್ರಿಚಕ್ರವಾಹನಗಳಿಗೆ ಮೊದಲ ವರ್ಷ ₹25 ಸಾವಿರ ಹಾಗೂ ಎರಡನೇ ವರ್ಷದಲ್ಲಿ ₹12500 ಸಬ್ಸಿಡಿ ದೊರೆಯಲಿದೆ.  ಎಲ್‌5 ವರ್ಗಕ್ಕೆ ಸೇರಿದ (ಸರಕು ಸಾಗಣೆ ತ್ರಿಚಕ್ರವಾಹನ) ವಾಹನಗಳಿಗೆ ಪ್ರಥಮ ವರ್ಷ ₹50 ಸಾವಿರ ಹಾಗೂ ದ್ವಿತೀಯ ವರ್ಷದಲ್ಲಿ ₹25 ಸಾವಿರ ಸಬ್ಸಿಡಿ ಸಿಗಲಿದೆ. ಎಲೆಕ್ಟ್ರಿಕ್‌ ಸ್ಕೂಟರ್‌ ತಯಾರಿಸುವ ಓಲಾ ಟಿವಿಎಸ್‌ ಅಥೆರ್‌ ಎನರ್ಜಿ ಹೀರೊ ವಿದಾ (ಹೀರೊ ಮೋಟೊಕಾರ್ಪ್‌) ಮತ್ತು ಚೇತಕ್‌ ಬಜಾಜ್‌ನ ಬ್ಯಾಟರಿ ಸಾಮರ್ಥ್ಯ 2.88ರಿಂದ 4 ಕೆಡಬ್ಲ್ಯುಎಚ್‌ ಇದೆ. ಇವುಗಳ ಬೆಲೆ ₹90 ಸಾವಿರದಿಂದ ₹1.5 ಲಕ್ಷ ಇದೆ.

‘ಪಿಎಂ ಇ–ಡ್ರೈವ್‌’ ಪೋರ್ಟಲ್‌ ಮೂಲಕ ಆಧಾರ್ ಸಂಖ್ಯೆ ದೃಢೀಕೃತ ಇ–ವೋಚರ್‌ ನೀಡಲಾಗುತ್ತದೆ. ವಾಹನ ಖರೀದಿ ಬಳಿಕ ಖರೀದಿದಾರ  ನೋಂದಣಿ ಮಾಡಿರುವ ಮೊಬೈಲ್‌ಗೆ ಇ–ವೋಚರ್‌ ರವಾನೆಯಾಗಲಿದೆ. ಇದಕ್ಕೆ ಆತ ಖರೀದಿದಾರ ಸಹಿ ಮಾಡಿ ಡೀಲರ್‌ಗೆ ಸಲ್ಲಿಸಬೇಕಿದೆ.  ಬಳಿಕ ಡೀಲರ್‌ ಕೂಡ ಸಹಿ ಮಾಡಿ ಪೋರ್ಟಲ್‌ನಲ್ಲಿ ಅಪ್‌ಲೋಡ್ ಮಾಡಬೇಕಿದೆ. ಸಬ್ಸಿಡಿ ಪಡೆಯಲು ಈ ಇಬ್ಬರು ವೋಚರ್‌ಗೆ ಸಹಿ ಮಾಡಬೇಕಿದೆ.