‘ಪಿಎಂ ಇ–ಡ್ರೈವ್‌’ಗೆ ಚಾಲನೆ: ಯೋಜನೆಗೆ ₹10,900 ಕೋಟಿ ನಿಗದಿ
ನವದೆಹಲಿ: ದೇಶದಲ್ಲಿ ವಿದ್ಯುತ್ ಚಾಲಿತ ವಾಹನಗಳಿಗೆ ಉತ್ತೇಜನ ನೀಡುವ ನಿಟ್ಟಿನಲ್ಲಿ ರೂಪಿಸಿರುವ ‘ಪಿಎಂ ಇ–ಡ್ರೈವ್‌’ ಯೋಜನೆಗೆ ಕೇಂದ್ರ ಸರ್ಕಾರ ಮಂಗಳವಾರ ಚಾಲನೆ ನೀಡಿದೆ.
ವಿದ್ಯುತ್ ಚಾಲಿತ ವಾಹನಗಳ ತ್ವರಿತ ಬಳಕೆ, ಚಾರ್ಜಿಂಗ್‌ ಕೇಂದ್ರಗಳ ಮೂಲ ಸೌಕರ್ಯ ಅಭಿವೃದ್ಧಿ ಹಾಗೂ ಇ–ವಾಹನ ತಯಾರಿಕೆಗೆ ಒತ್ತು ನೀಡಲು ಯೋಜನೆಯಡಿ ₹10,900 ಕೋಟಿ ಮೀಸಲಿಟ್ಟಿದೆ. ಪ್ರಸಕ್ತ ವರ್ಷದ ಅಕ್ಟೋಬರ್ 1ರಿಂದ 2026ರ ಮಾರ್ಚ್‌ 31ರ ವರೆಗೆ ಯೋಜನೆಯು ಜಾರಿಯಲ್ಲಿ ಇರಲಿದೆ.
ಇದರಡಿ ಇಎಂಪಿಎಸ್–2024 (ಎಲೆಕ್ಟ್ರಿಕ್ ಮೊಬಿಲಿಟಿ ಪ್ರಚಾರ ಯೋಜನೆ) ಅನ್ನು ಅನುಷ್ಠಾನಗೊಳಿಸಲಾಗಿದೆ.
‘ಫೇಮ್‌’ ಬದಲು ಜಾರಿಗೊಂಡಿರುವ ಈ ಯೋಜನೆಯಡಿ ಗ್ರಾಹಕರಿಗೆ ಸಬ್ಸಿಡಿ ಪ್ರಯೋಜನ ಸಿಗಲಿದೆ. ಈ ಸಂಬಂಧ ಇ–ವೋಚರ್‌ ನೀಡಲು ಮೊಬೈಲ್‌ ಆ್ಯಪ್ ಅನ್ನು ಬಿಡುಗಡೆ ಮಾಡಲಾಗುವುದು’ ಎಂದು ಕೇಂದ್ರ ಬೃಹತ್‌ ಕೈಗಾರಿಕೆಗಳ ಸಚಿವಾಲಯದ ಕಾರ್ಯದರ್ಶಿ ಹನೀಫ್ ಖುರೇಷಿ ತಿಳಿಸಿದ್ದಾರೆ.
‘ಒಂದು ಆಧಾರ್ ಸಂಖ್ಯೆಗೆ ಒಂದು ವಾಹನಕ್ಕಷ್ಟೇ ಸಬ್ಸಿಡಿಗೆ ಅನುಮತಿ ನೀಡಲಾಗಿದೆ. ಯೋಜನೆಯಡಿ ವಿದ್ಯುತ್ ಚಾಲಿತ ವಾಹನಗಳ ಪರೀಕ್ಷಾ ಸೌಲಭ್ಯವನ್ನು ಮೇಲ್ದರ್ಜೆಗೇರಿಸಲು ₹780 ಕೋಟಿ ನಿಗದಿಪಡಿಸಲಾಗಿದೆ’ ಎಂದು ವಿವರಿಸಿದ್ದಾರೆ.
ಇ–ದ್ವಿಚಕ್ರವಾಹನ, ಇ–ತ್ರಿಚಕ್ರವಾಹನ, ಇ–ಆಂಬುಲೆನ್ಸ್‌, ಇ–ಟ್ರಕ್‌ಗಳಿಗೆ ಸಬ್ಸಿಡಿ ನೀಡಲು ₹3,679 ಕೋಟಿ ಮೀಸಲಿಡಲಾಗಿದೆ. ಒಟ್ಟು 24.79 ಲಕ್ಷ ದ್ವಿಚಕ್ರವಾಹನ, 3.16 ಲಕ್ಷ ತ್ರಿಚಕ್ರವಾಹನ ಹಾಗೂ 14,028 ಇ–ಬಸ್‌ಗಳಿಗೆ ಸಬ್ಸಿಡಿ ದೊರೆಯಲಿದೆ.
ಯೋಜನೆಯಡಿ ಸಾರ್ವಜನಿಕ ಸ್ಥಳಗಳಲ್ಲಿ ಚಾರ್ಜಿಂಗ್‌ ಕೇಂದ್ರಗಳನ್ನು ಸ್ಥಾಪಿಸಲಾಗುತ್ತದೆ. ಇದಕ್ಕಾಗಿ ₹2 ಸಾವಿರ ಕೋಟಿ ಮೀಸಲಿಡಲಾಗಿದೆ.
ವಾಹನ ತಯಾರಿಸುವ ಕಂಪನಿಗಳು ‘ಪಿಎಂ ಇ–ಡ್ರೈವ್‌’ನ ಪ್ರಯೋಜನ ಪಡೆಯಲು ಸರ್ಕಾರ ನಿಗದಿಪಡಿಸಿರುವ ಮಾರ್ಗಸೂಚಿಗಳನ್ನು ಪಾಲಿಸಬೇಕಿದೆಎಚ್.ಡಿ. ಕುಮಾರಸ್ವಾಮಿ ಕೇಂದ್ರ ಬೃಹತ್‌ ಕೈಗಾರಿಕಾ ಸಚಿವ
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.