ಮುಂಡರಗಿ: ತುಂಗಭದ್ರೆಯಲ್ಲಿ ಮತ್ತೆ ಗರಿಗೆದರಿದ ಮೀನುಗಾರಿಕೆ

ತುಂಗಭದ್ರಾ ನದಿಯಲ್ಲಿ ಜಿಲೇಬಿ ಹವಳಮಟ್ಟು ಮುರುಕೋಡು ಕಾಗಿ ಬಾಳಿ ಮೊದಲಾದ ತಳಿಯ ಮೀನುಗಳು ದೊರೆಯುತ್ತವೆ. ಒಂದೊಂದು ತಳಿಯ ಮೀನಿಗೆ ಒಂದೊಂದು ದರ ನಿಗದಿಯಾಗಿರುತ್ತದೆ. ಆದರೆ ಇಲ್ಲಿಯ ಮೀನುಗಾರರು ಸಾಮಾನ್ಯವಾಗಿ ಒಂದು ಕೆ.ಜಿ ಮೀನನ್ನು ₹ 50-60ಕ್ಕೆ ಮಾರಾಟ ಮಾಡುತ್ತಾರೆ. ಪ್ರತಿಯೊಬ್ಬ ಮೀನುಗಾರರು ನಿತ್ಯ ₹ 400- ₹ 500 ಆದಾಯ ಪಡೆದುಕೊಂಡು ಮಧ್ಯಾಹ್ನ ಬೇರೆ ಕೆಲಸಕ್ಕೆ ತೆರಳುತ್ತಾರೆ. ಮಾರುಕಟ್ಟೆಯಲ್ಲಿ ವ್ಯಾಪಾರಸ್ಥರು ಮೀನುಗಳ ತಳಿ ಗಾತ್ರ ಆಕಾರ ಮೊದಲಾದವುಗಳಿಗೆ ಅನುಗುಣವಾಗಿ ₹ 100- ₹200ಕ್ಕೆ ಕೆಜಿಯಂತೆ ಗ್ರಾಹಕರಿಗೆ ಮಾರಾಟ ಮಾಡುತ್ತಾರೆ. ಎಲ್ಲ ಮಾರುಕಟ್ಟೆಗಳಲ್ಲಿ ಇರುವಂತೆ ಇಲ್ಲಿಯೂ ಮೀನುಗಾರರಿಗಿಂತ ಮಧ್ಯವರ್ತಿಗಳೇ ಹೆಚ್ಚು ಲಾಭ ಮಾಡಿಕೊಳ್ಳುತ್ತಾರೆ.

ನದಿಯಲ್ಲಿ ನೀರು ರಭಸವಾಗಿ ಹರಿದರೆ ಮೀನುಗಾರರಿಗೆ ಸಾಕಷ್ಟು ಮೀನುಗಳು ದೊರೆಯುವುದಿಲ್ಲ. ನೀರು ತಟಸ್ಥವಾಗಿ ನಿಂತರೆ ಭರಪೂರ ಮೀನುಗಳು ದೊರೆಯುತ್ತವೆ. ಹೀಗಾಗಿ ಮೀನುಗಾರರು ನದಿಯಲ್ಲಿ ನೀರು ತಟಸ್ಥವಾಗಿ ನಿಲ್ಲಬೇಕೆಂದು ಬಯಸುತ್ತಾರೆ.