ಹಿಂದೂಗಳೆಂದು ಕರೆದುಕೊಳ್ಳುವವರು ಹಿಂಸೆ, ದ್ವೇಷ ಹರಡುತ್ತಿದ್ದಾರೆ: ರಾಹುಲ್ ಗಾಂಧಿ

ಮಾಹಿತಿ ಮತ್ತು ಪ್ರಸಾರ ಸಚಿವ ಅಶ್ವಿನಿ ವೈಷ್ಣವ್, ಸಂಸದೀಯ ವ್ಯವಹಾರಗಳ ಸಚಿವ ಕಿರಣ್ ರಿಜಿಜು ಮತ್ತು ಬಿಜೆಪಿ ಮುಖಂಡ ಸುಧಾಂಶು ತ್ರಿವೇದಿ ಜಂಟಿ ಪತ್ರಿಕಾಗೋಷ್ಠಿ ನಡೆಸಿ ರಾಹುಲ್‌ ಹೇಳಿಕೆಯನ್ನು ಖಂಡಿಸಿದರು.

ರಾಷ್ಟ್ರಪತಿಗಳ ಭಾಷಣದ ವಂದನಾ ನಿರ್ಣಯದ ಮೇಲಿನ ಚರ್ಚೆಯಲ್ಲಿ ಪಾಲ್ಗೊಂಡು ರಾಹುಲ್‌ ಸುಮಾರು 100 ನಿಮಿಷಗಳ ಮಾತನಾಡಿದರು. ರಾಹುಲ್‌ ಭಾಷಣವನ್ನು ತಾಯಿ ಸೋನಿಯಾ ಗಾಂಧಿ ಹಾಗೂ ಸಹೋದರಿ ಪ್ರಿಯಾಂಕಾ ಗಾಂಧಿ ವಾದ್ರಾ ಸಂದರ್ಶಕರ ಗ್ಯಾಲರಿಯಲ್ಲಿ ಕುಳಿತು ವೀಕ್ಷಿಸಿದರು. 

ವಿಪಕ್ಷ ನಾಯಕ ಭಾಷಣ ಆರಂಭಿಸುತ್ತಿದ್ದಂತೆ ಬಿಜೆಪಿ ಸದಸ್ಯರು ‘ಭಾರತ್‌ ಮಾತಾಕಿ ಜೈ’, ‘ಮೋದಿ ಮೋದಿ’ ಎಂಬ ಘೋಷಣೆಗಳನ್ನು ಕೂಗಿದರು. ಬಳಿಕ ‘ಜೈ ಸಂವಿಧಾನ’ ಎಂದೂ ಸೇರಿಸಿದರು. ಸಂವಿಧಾನ ಪ್ರತಿ ಪ್ರದರ್ಶಿಸಿದ ರಾಹುಲ್‌, ಬಿಜೆಪಿ ಮುಖಂಡರ ಬಾಯಲ್ಲಿ ‘ಜೈ ಸಂವಿಧಾನ’ ಎಂಬ ಹೇಳಿಕೆ ಬರುವಂತೆ ಮಾಡಿದ್ದೇವೆ. ಇದು ನಮ್ಮ ಸಾಧನೆ’ ಎಂದು ಪ್ರತಿಪಾದಿಸಿದರು. 

ಶಿವನ ಚಿತ್ರ ಪ್ರದರ್ಶಿಸಿ ಅವರು ಮಾತು ಮುಂದುವರಿಸಿದರು. ಆಗ ಲೋಕಸಭಾಧ್ಯಕ್ಷ ಓಂ ಬಿರ್ಲಾ, ‘ನಿಯಮಗಳ ಪ್ರಕಾರ ಸದನದಲ್ಲಿ ಚಿತ್ರಗಳನ್ನು ಪ್ರದರ್ಶಿಸುವಂತಿಲ್ಲ’ ಎಂದು ಸೂಚಿಸಿದರು. ‘ಶಿವನ ಈ ಚಿತ್ರವು ಅಹಿಂಸೆಯ ಸಂದೇಶ ನೀಡುತ್ತದೆ. ಶಿವ ಇಡೀ ದೇಶದ ಜನರ ಹೃದಯದಲ್ಲಿದ್ದಾನೆ’ ಎಂದು ರಾಹುಲ್‌ ವ್ಯಾಖ್ಯಾನಿಸಿದರು. ಭಗವಾನ್ ಶಿವನ ಗುಣಲಕ್ಷಣಗಳನ್ನು, ಗುರುನಾನಕ್, ಬುದ್ಧ ಮತ್ತು ಮಹಾವೀರರ ಬೋಧನೆಗಳನ್ನು ಉಲ್ಲೇಖಿಸಿದ ಅವರು, ‘ದೇಶದ ಎಲ್ಲ ಧರ್ಮಗಳು ಮತ್ತು ಮಹಾನ್ ವ್ಯಕ್ತಿಗಳು ಹೆದರಬೇಡಿ, ಇತರರನ್ನು ಹೆದರಿಸಬೇಡಿ’ ಎಂದು ಹೇಳಿದ್ದಾರೆ’ ಎಂದು ನೆನಪಿಸಿದರು.

‘10 ವರ್ಷಗಳಿಂದ ಭಾರತದ ಪರಿಕಲ್ಪನೆ ಹಾಗೂ ಸಂವಿಧಾನದ ಮೇಲೆ ಬಿಜೆಪಿ ನಿರಂತರ ದಾಳಿ ನಡೆಸಿದೆ. ಬಿಜೆಪಿಯ ಸಿದ್ಧಾಂತವನ್ನು ಲಕ್ಷಾಂತರ ಮಂದಿ ವಿರೋಧಿಸಿದ್ದಾರೆ. ವಿರೋಧ ಪಕ್ಷಗಳ ಹಲವು ನಾಯಕರು ಜೈಲಿನಲ್ಲಿದ್ದಾರೆ. ಇನ್ನು ಕೆಲವರು ಈಚೆಗೆ ಬಂದಿದ್ದಾರೆ. ಸಂವಿಧಾನದ ಉಳಿವಿಗಾಗಿ ನಮ್ಮ ಹೋರಾಟ ನಿರಂತರ’ ಎಂದು ಹೇಳಿದರು. 

‘ಇದು ಅಹಿಂಸೆಯ ದೇಶ. ಭಯದ ದೇಶವಲ್ಲ. ಎಲ್ಲ ಧರ್ಮಗಳು ಮತ್ತು ನಮ್ಮ ಎಲ್ಲ ಮಹಾಪುರುಷರು ಅಹಿಂಸೆ ಮತ್ತು ನಿರ್ಭೀತಿ ಬಗ್ಗೆ ಮಾತನಾಡಿದ್ದಾರೆ. ಆದರೆ, ತಮ್ಮನ್ನು ತಾವು ಹಿಂದೂಗಳು ಎಂದು ಕರೆದುಕೊಳ್ಳುವವರು ಹಿಂಸೆ, ದ್ವೇಷ ಮತ್ತು ಸುಳ್ಳಿನ ಬಗ್ಗೆ ಮಾತ್ರ ಮಾತನಾಡುತ್ತಾರೆ’ ಎಂದ ಅವರು, ‘ಆಪ್ ಹಿಂದೂ ಹೋ ಹಿ ನಹೀ (ನೀವು ಹಿಂದೂಗಳಲ್ಲ)’ ಎಂದು ಬಿಜೆಪಿ ಸದಸ್ಯರಿಗೆ ಛೇಡಿಸಿದರು.

ಈ ಮಾತಿಗೆ ಬಿಜೆಪಿ ಸದಸ್ಯರು ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. ಸದನದಲ್ಲಿ ಕೋಲಾಹಲ ಸೃಷ್ಟಿಯಾಯಿತು. ರಾಹುಲ್ ಹೇಳಿಕೆಯನ್ನು ಪ್ರಧಾನಿ ಖಂಡಿಸಿದರು. ಕೋಟ್ಯಂತರ ಹಿಂದೂಗಳನ್ನು ಅವಮಾನಿಸಿದ್ದಕ್ಕಾಗಿ ರಾಹುಲ್ ಅವರು ಸದನ ಹಾಗೂ ದೇಶದ ಕ್ಷಮೆಯಾಚಿಸಬೇಕು ಎಂದು ಗೃಹ ಸಚಿವ ಅಮಿತ್‌ ಶಾ ಆಗ್ರಹಿಸಿದರು.

ತುರ್ತು ಪರಿಸ್ಥಿತಿ ಹಾಗೂ 1984ರ ಸಿಖ್‌ ವಿರೋಧಿ ದಂಗೆ ಬಗ್ಗೆ ಪ್ರಸ್ತಾಪಿಸಿದ ಶಾ, ‘ದೇಶದಲ್ಲಿ ಭಯೋತ್ಪಾದನೆ ಹರಡಿದ್ದು ಕಾಂಗ್ರೆಸ್‌. ಅಹಿಂಸೆ ಬಗ್ಗೆ ಮಾತನಾಡಲು ರಾಹುಲ್‌ಗೆ ಯಾವುದೇ ಹಕ್ಕಿಲ್ಲ’ ಎಂದರು. ಸಚಿವರಾದ ಕಿರಣ್ ರಿಜಿಜು ಮತ್ತು ಭೂಪೇಂದರ್ ಯಾದವ್ ಅವರು ರಾಹುಲ್‌ ಭಾಷಣದ ವಿವಿಧ ಹಂತಗಳಲ್ಲಿ ಮಧ್ಯಪ್ರವೇಶಿಸಿ ತಗಾದೆ ಎತ್ತಿದರು.

ಬಿಜೆಪಿ ಸದಸ್ಯರು ಗದ್ದಲ ತೀವ್ರಗೊಳಿಸಿದಾಗ ರಾಹುಲ್‌ ಅವರು ಕೈಯಲ್ಲಿ ‘ಅಭಯ ಮುದ್ರೆ’ ಸಂಜ್ಞೆ ಮಾಡಿ ತೋರಿಸಿದರು. ಅಯೋಧ್ಯೆ ಬಗ್ಗೆ ಉಲ್ಲೇಖಿಸುವಾಗ ಫೈಜಾಬಾದ್‌ ಸಂಸದ ಅವಧೇಶ್‌ ಪ್ರಸಾದ್‌ ಅವರ ಕೈಕುಲುಕಿ ಅಭಿನಂದಿಸಿದರು.

* ಪ್ರತಿಪಕ್ಷಗಳು ನಿಮ್ಮ ಶತ್ರುವಲ್ಲ. ದೇಶವನ್ನು ಪ್ರಗತಿಯತ್ತ ಕೊಂಡೊಯ್ಯಲು ಸಂಪೂರ್ಣ ಸಹಕಾರ ಮತ್ತು ಬೆಂಬಲ ನೀಡುತ್ತೇವೆ.

* ಫೈಜಾಬಾದ್‌ನ ಬಿಜೆಪಿ ಅಭ್ಯರ್ಥಿಯನ್ನು ಸೋಲಿಸುವ ಮೂಲಕ ಅಯೋಧ್ಯೆಯ ಜನರು ಆ ಪಕ್ಷಕ್ಕೆ ಸ್ಪಷ್ಟ ಸಂದೇಶವನ್ನು ನೀಡಿದ್ದಾರೆ. ತಮ್ಮ ಮನೆ ನೆಲಸಮಗೊಳಿಸಿದ್ದಕ್ಕೆ ಹಾಗೂ ಪರಿಹಾರ ನೀಡದಿರುವುದಕ್ಕೆ ಅಲ್ಲಿನ ಜನರಿಗೆ ಬಿಜೆಪಿ ವಿರುದ್ಧ ಕೋಪ ಹಾಗೂ ಅಸಮಾಧಾನವಿದೆ.

* ನರೇಂದ್ರ ಮೋದಿ ಅವರು ಅಯೋಧ್ಯೆಯಿಂದ ಸ್ಪರ್ಧಿಸಲು ಬಯಸಿದ್ದರು ಹಾಗೂ ಅದಕ್ಕಾಗಿ ಎರಡು ಸರ್ವೆಗಳನ್ನು ಮಾಡಿಸಿದ್ದರು. ಅವರು ಸೋಲುತ್ತಾರೆ ಎಂದು ಎರಡೂ ಸರ್ವೆಗಳು ತಿಳಿಸಿದ್ದವು. ತದನಂತರ ಮೋದಿ ವಾರಾಣಾಸಿಗೆ ಓಡಿಹೋದರು.

* ನೀಟ್ ವೃತ್ತಿಪರ ಪರೀಕ್ಷೆಯಿಂದ ವಾಣಿಜ್ಯ ಪರೀಕ್ಷೆಯಾಗಿ ಬದಲಾಗಿದ್ದರಿಂದ ವಿದ್ಯಾರ್ಥಿಗಳು ಅದರಲ್ಲಿ ನಂಬಿಕೆ ಕಳೆದುಕೊಂಡಿದ್ದಾರೆ. ಶ್ರೀಮಂತರಿಗೆ ಅನುಕೂಲವಾಗುವಂತೆ ರೂಪಿಸಲಾಗಿದೆ.