ಶಾಂತಿಪಾಲನಾ ಪಡೆ ವಾಪಸ್ ಇಲ್ಲ: ಇಸ್ರೇಲ್‌ ಮನವಿ ತಿರಸ್ಕರಿಸಿದ ಫ್ರಾನ್ಸ್‌, ಸ್ಪೇನ್

ಜೆರುಸಲೇಂ: ಹಿಜ್ಬುಲ್ಲಾ ಬಂಡುಕೋರರು ನಡೆಸಿದ ಡ್ರೋನ್‌ ದಾಳಿಗೆ ಇಸ್ರೇಲ್‌ನ ನಾಲ್ವರು ಯೋಧರು ಬಲಿಯಾಗಿದ್ದು ಏಳು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದಾರೆ.  ಮಧ್ಯ ಇಸ್ರೇಲ್‌ನ ಬಿನ್ಯಾಮಿನ ನಗರದ ಸೇನಾ ನೆಲೆಯನ್ನು ಗುರಿಯಾಗಿಸಿ ಭಾನುವಾರ ಡ್ರೋನ್ ದಾಳಿ ನಡೆದಿದೆ. ಇಸ್ರೇಲ್‌ ಸೇನೆ ಬೈರೂತ್‌ ಮೇಲೆ ಗುರುವಾರ ನಡೆಸಿದ ದಾಳಿಗೆ ಪ್ರತಿಯಾಗಿ ಈ ದಾಳಿ ನಡೆಸಿದ್ದೇವೆ ಎಂದು ಹಿಜ್ಬುಲ್ಲಾ ಪ್ರಕಟಣೆ ತಿಳಿಸಿದೆ.  ಡ್ರೋನ್‌ ದಾಳಿಯಲ್ಲಿ ಒಟ್ಟು 61 ಮಂದಿ ಗಾಯಗೊಂಡಿದ್ದಾರೆ ಎಂದು ಇಸ್ರೇಲ್‌ ಸೇನೆಯ ಮೂಲಗಳು ಹೇಳಿವೆ. 

ಗಾಜಾದಲ್ಲಿ ನಿರಾಶ್ರಿತರು ತಂಗಿದ್ದ ಶಾಲೆಯ ಮೇಲೆ ಭಾನುವಾರ ರಾತ್ರಿ ಇಸ್ರೇಲ್‌ ನಡೆಸಿದ ಬಾಂಬ್‌ ದಾಳಿಯಲ್ಲಿ ಮಹಿಳೆಯರು ಮತ್ತು ಮಕ್ಕಳೂ ಸೇರಿದಂತೆ 20 ಮಂದಿ ಮೃತಪಟ್ಟಿದ್ದಾರೆ. ಯುದ್ಧದಿಂದಾಗಿ ನಿರ್ವಸಿತರಾದವರು ನುಸೈರತ್‌ನಲ್ಲಿರುವ ಶಾಲೆಯಲ್ಲಿ ಆಶ್ರಯ ಪಡೆದಿದ್ದರು.  ದೇರ್‌ ಅಲ್‌ ಬಲಾಹ್‌ನ ಅಲ್‌ ಅಕ್ಸಾ ಹುತಾತ್ಮರ ಆಸ್ಪತ್ರೆಯ ಮೇಲೆ ಸೋಮವಾರ ನಡೆದ ದಾಳಿಯಲ್ಲಿ ಮೂವರು ಮೃತಪಟ್ಟು ಸುಮಾರು 50 ಮಂದಿ ಗಾಯಗೊಂಡಿದ್ದಾರೆ. ಆಸ್ಪತ್ರೆಯ ಬಳಿ ಹಾಕಿದ್ದ ತಾತ್ಕಾಲಿಕ ಟೆಂಟ್‌ಗಳು ಬೆಂಕಿಗೆ ಆಹುತಿಯಾಗಿವೆ ಎಂದು ಆಸ್ಪತ್ರೆಯ ಮೂಲಗಳು ಹೇಳಿವೆ.