ಚಿಂಚೋಳಿ |ಹೆದ್ದಾರಿಯಲ್ಲಿ ಪ್ರಯಾಣಿಕರ ಸರ್ಕಸ್; ಅನುದಾನ ನೀಡುವಲ್ಲಿ ತಾರತಮ್ಯ ಆರೋಪ

ತಾಲ್ಲೂಕಿನಲ್ಲಿ ಅಭಿವೃದ್ಧಿ ಕಾಮಗಾರಿಗಳು ಸ್ಥಗಿತಗೊಂಡಿವೆ ಜತೆಗೆ ವಿಶೇಷ ಅನುದಾನ ಮರಿಚೀಕೆಯಾಗಿದೆ. ಶಾಸಕರು ಬಿಜೆಪಿಯವರಾಗಿದ್ದರಿಂದ ಆಡಳಿತಾರೂಢ ಕಾಂಗ್ರೆಸ್ ಸರ್ಕಾರ ಅನುದಾನ ನೀಡುತ್ತಿಲ್ಲ ಎಂಬ ಆರೋಪ ಜನ ಸಾಮಾನ್ಯರಿಂದ ಕೇಳಿ ಬರುತ್ತಿದೆ.

ಐನಾಪುರ ಏತ ನೀರಾವರಿ ಯೋಜನೆಗೆ 2 ವರ್ಷದ ಹಿಂದೆಯೇ ಕ್ಯಾಬಿನೆಟ್ ಅನುಮೋದನೆ ದೊರಕಿದ್ದು, ಟೆಂಡರ್ ಅಂತಿಮಗೊಂಡಿದೆ. ಆದರೆ ಮುಖ್ಯಮಂತ್ರಿಗಳ ಅಧ್ಯಕ್ಷತೆಯ ಕರ್ನಾಟಕ ನೀರಾವರಿ ನಿಗಮದ ಸಭೆಯಲ್ಲಿ ಅನುಮೋದನೆಗಾಗಿ ಒಂದೂವರೆ ವರ್ಷದಿಂದ ಚಾತಕ ಪಕ್ಷಿಯಂತೆ ಕಾಯುತ್ತಿರುವ ಜನರಲ್ಲಿ ಬೇಸರ ಮೂಡಿಸುತ್ತಿದೆ.

ನಾಗಾಈದಲಾಯಿ ಕೆರೆ ಕಾಯಕಲ್ಪಕ್ಕೆ ಕಾಯುತ್ತಿದೆ. ಸೋರುತ್ತಿರುವ ನ್ಯಾಯಾಲಯ ಕಟ್ಟಡಕ್ಕೆ ಪ್ರತಿಯಾಗಿ ಹೊಸ ಕಟ್ಟಡದ ಪ್ರಸ್ತಾವನೆಗೂ ಕಲಬುರಗಿ ಕ್ಯಾಬಿನೆಟ್ ಅನುಮೋದಿಸಿಲ್ಲ. ಸ್ನಾತಕೋತ್ತರ ಕೇಂದ್ರ, ಅರಣ್ಯ ಕಾಲೇಜು ಮರೀಚಿಕೆಯಾಗಿವೆ. ಬಹು ನಿರೀಕ್ಷೆಯ ಪರಿಸರ ಪ್ರವಾಸೋದ್ಯಮ ಉತ್ತೇಜನವೂ ಗಗನಕುಸುಮವಾಗಿದೆ.

ಚಿಂಚೋಳಿ – ಭಾಲ್ಕಿ ರಾಜ್ಯ ಹೆದ್ದಾರಿ 75, ರಾಯಚೂರು – ವನ್ಮಾರಪಳ್ಳಿ ರಾಜ್ಯ ಹೆದ್ದಾರಿ 15, ರಾಷ್ಟ್ರೀಯ  ಹೆದ್ದಾರಿ 167, ರಾಜ್ಯ ಹೆದ್ದಾರಿ ಶಹಾಪುರ – ಶಿವರಾಂಪುರ 149 ವ್ಯಾಪ್ತಿಯಲ್ಲಿ ಬರುವ ಗಣಾಪುರದಿಂದ ಕುಂಚಾವರಂ ಕ್ರಾಸ್ ಹಾಗೂ ಕುಂಚಾವರಂ ಕ್ರಾಸ್‌ನಿಂದ ಕುಂಚಾವರಂವರೆಗೆ ರಸ್ತೆಗಳು ಕೆಟ್ಟು ಹೋಗಿವೆ. ಇದರಲ್ಲಿ ಚಿಂಚೋಳಿಯಿಂದ ಸುಲೇಪೇಟವರೆಗಿನ ಹೆದ್ದಾರಿ ಸಂಚಾರ ನರಕ ದರ್ಶನ ಮಾಡಿಸುತ್ತಿದೆ.

‘ನಿತ್ಯ ಈ ರಸ್ತೆಯಲ್ಲಿ ಪ್ರಯಾಣಿಕರ ವಾಹನಗಳು ಮಗುಚಿ ಬೀಳುತ್ತಿವೆ. ಚಿಂಚೋಳಿ ತಾಲ್ಲೂಕಿನಲ್ಲಿ ಹೆದ್ದಾರಿಗಳು ಹಾಳಾಗಿದ್ದರಿಂದ ವಿಶೇಷ ಅನುದಾನ ಬರುತ್ತಿಲ್ಲ. ಎಲ್ಲದಕ್ಕೂ ಕಲ್ಯಾಣ ಕರ್ನಾಟಕ ಅಭಿವೃದ್ಧಿ ಮಂಡಳಿಯತ್ತ ಸರ್ಕಾರ ಬೊಟ್ಟು ಮಾಡುವುದು ಸರಿಯಲ್ಲ. ಗಡಿ ತಾಲ್ಲೂಕಿಗೆ ವಿಶೇಷ ಅನುದಾನ ನೀಡಬೇಕು’ ಎಂದು ಬಿಜೆಪಿ ಮುಖಂಡ ಶರಣಪ್ಪ ತಳವಾರ ಒತ್ತಾಯಿಸಿದರು.